Франција денес се збогува со Брижит Бардо, која почина на 92-годишна возраст, а политичари, филмски познати личности и обични граѓани ѝ оддаваат почит на социјалните мрежи.
„Нејзините филмови, нејзиниот глас, нејзината блескава слава, нејзините иницијали, нејзините таги, нејзината великодушна страст кон животните – Брижит Бардо го отелотвори животот на слободата, француското постоење, универзалниот сјај. Таа нè допре. Жалиме за легендата на векот“, напиша францускиот претседател Емануел Макрон на платформата „Икс“.
Француската министерка за култура Рашида Дати рече дека смртта на Бардо е загуба на „иконата меѓу иконите“.
„Неуморна застапничка за правата на животните, таа е легенда која помогна во обликувањето на нашата имагинација без никогаш да дозволи да биде ограничена од ништо“, додаде министерката во порака на „Икс“.
Според неа, актерката ја претставува слободата – на француски начин.
Лидерката на крајната десница Марин Ле Пен рече дека смртта на Бардо е „длабока загуба“.
„Франција изгуби извонредна жена, позната по својот талент, храброст, искреност и убавина. Жена која одлучи да стави крај на неверојатна кариера за да се посвети на животните, кои ги бранеше до последниот здив со неисцрпна енергија и љубов“, рече Марин Ле Пен.
Режисерот Клод Лелуш рече дека актерката била природна и затоа сакала да биде во контакт со природата и животните.
Групата за права на животните Пета рече дека Брижит Бардо „беше ангел за животните“ и додаде дека се борела за нив, вклучително и преку законски средства за да ги заштити.
Актерката, која на врвот на својата кариера му го сврте грбот на филмот и светската слава за целосно да се посвети на заштитата на животните, живее на својот имот на југот на Франција во близина на Сен Тропе во последните неколку децении, опкружена со животни.
Граѓаните на Сен Тропе денес се собираат пред нејзиниот имот за да остават цвеќе, додека градските власти соопштија дека Брижит Бардо ќе остане во колективното сеќавање на сите, особено во регионот каде што живеела.
Времето и местото на погребот сè уште не се објавени.
ИЗДВОЕНИ
Разговор со Марија Павлеска, основач на профилот „Мама (ми) чита“: Децата прифаќаат книги ако им се понудат на вистинскиот начин – читајте заедно!
Време е за подароци, но внимавајте какви играчки купувате – токсични кадифени кукли и балони, опасни „паметни“ играчки… сè уште стигнуваат до детските соби
Стапката на сиромаштија во Македонија во 2024 година изнесувала 21,9 проценти: Секој петти граѓанин едвај крпи крај со крај!
Инспекторите не најдоа загадување – „Усје“ и натаму под лупа
