Франција ја презема одбраната на Европа, распоредува нуклеарни „Рафали“ во Германија?

Во услови на растечка неизвесност околу безбедносните гаранции на САД под водство на претседателот Доналд Трамп, Европа се соочува со егзистенцијални прашања за сопствената одбрана.

Во овој вакуум, Франција, под водство на Емануел Макрон, сè повеќе се позиционира како сила подготвена да ја преземе водечката улога. Предлоотг што до вчера беше незамислив е на маса: Париз размислува да ги стационира своите нуклеарни борбени авиони на германска почва, а првите чекори во оваа насока веќе се преземени во Полска.

Стратешка порака до Москва и Вашингтон Идејата што сè повеќе се дискутира во дипломатските кругови вклучува распоредување на француски повеќенаменски ловци „Дасо Рафал“, опремени со нуклеарни крстосувачки ракети ASMP-A, во германските воздухопловни бази.

Таквиот потег би имал двојна намена: би испратил силна порака за одвраќање до Русија, а истовремено би сигнализирал и способност на Европа да дејствува независно од САД. Француските претставници, како што објави британскиот „Телеграф“, нагласуваат дека таков потег „нема да биде технички тежок и би испратил силна стратешка порака“. Предлогот добива на тежина по разговорите на Макрон со Фридрих Мерц, кој отворено повика на зајакнување на независните нуклеарни капацитети на Европа. Германските дипломати велат дека француската иницијатива би можела да изврши притисок врз Обединетото Кралство да покаже слична посветеност на европската безбедност.

Сепак, изворите предупредуваат дека таков договор веројатно ќе остане неофицијален сè додека Вашингтон значително не го промени своето нуклеарно присуство во Европа, каде што под покровителство на НАТО сè уште одржува тактички бомби Б61 во неколку земји, вклучувајќи ја и Германија, пишува express.hr