Фон дер Лајен и нордиските земји се уверени дека ќе најдат решение за финансирање на Украина во декември

Претседателката на Европската комисија, Урсула фон дер Лајен, и нордиските лидери изјавија во понеделник дека се уверени дека ќе најдат решение во декември за финансирање на потребите на Украина за следните две години со користење на замрзнати руски средства, пренесе „Бета“.

„Цврсто ја поддржувам идејата за заем за репарации. Искрено верувам дека тоа е единствениот пат. И навистина ми се допаѓа идејата Русија да ја плати штетата што ја предизвика и изврши во Украина. За мене, нема алтернатива на заемот за репарации“, изјави данската премиерка Мете Фредриксен.

Таа рече дека верува оти е потребно да се донесат заклучоци на состанокот на ЕУ во декември за да можеме да продолжиме понатаму оттогаш.

Таа зборуваше на годишниот нордиски самит во Стокхолм, на кој присуствуваше и претседателката на Европската комисија, Урсула фон дер Лајен.

Европската унија сака да искористи дел од средствата на Русија за финансирање на нов заем од 140 милијарди евра за Украина. Идејата е да се позајми сумата од „Еуроклеар“ со седиште во Брисел, која потоа би ѝ ја позајмила на Украина. Украина би ги вратила парите само ако Русија ѝ ги плати воените репарации.

Европските лидери не успеаја да постигнат договор за ова прашање минатата недела во Брисел и побараа од Европската комисија да истражи начини за финансирање на Украина, оставајќи ја отворена можноста за одобрување на заемот, кој би се потпирал на замрзнати руски средства.

„Ова е правно валиден предлог кој не е без ризици“, рече претседателката на Европската комисија, која беше поканета на нордискиот самит за одбрана и конкурентност.

„Пораката до Русија е многу јасна, ние сме тука на долг рок. Подготвени сме да ги покриеме финансиските потреби на Украина, останувајќи со неа колку што е потребно“, додаде Урсула фон дер Лајен.

Предлогот за заем ќе биде на дневен ред на европскиот самит во декември. Беше формулиран во општи црти поради резервите на Белгија, земјата каде што се наоѓаат поголемиот дел од средствата. Белгија сака да има солидна правна основа за користење на овие средства и здружување на ризиците.

Шведскиот премиер Улф Кристерсон рече дека може да се смета на групата дека ќе ја донесе одлуката за време на состанокот на Советот на ЕУ во декември.