„Фолксваген“ и „Порше“ повлекуваат повеќе од 500.000 возила поради проблем со софтверот

Проблемите со софтверот можат да го спречат правилното прикажување на сликата на задната камера на автомобилот, што е доволна причина за да дојде до повлекување.

Германскиот производител на автомобили „Фолксваген“ и неговата подружница за луксузни автомобили „Порше“ објавија повлекување на вкупно повеќе од 500.000 возила во Соединетите Американски Држави поради проблем со софтверот што може да го спречи правилното прикажување на сликата на задната камера, соопшти американската Национална администрација за безбедност на сообраќајот на автопатиштата (NHTSA).

Според регулаторот, американската групација „Фолксваген“, вклучувајќи го и брендот Ауди, ќе мора да повлече 356.649 возила поради грешката во софтверот, објави „Ројтерс“.

Засегнатите модели се одредени модели на овој бренд произведени помеѓу 2019 и 2026 година, а овластените сервиси ќе го ажурираат софтверот бесплатно.

Овој потег следува по одлуката на „Порше“ минатата недела да повлече 173.538 возила во Соединетите Американски Држави од истата причина.

Ова е едно од најголемите поединечни безбедносни повлекувања од страна на подружница на Порше во Северна Америка во последниве години.

NHTSA забележа дека минатата година, производители како што се Хјундаи, Форд, Тојота и Крајслер биле принудени да повлечат возила за поправки поради слични проблеми со камерите за заден поглед, со цел да се намали ризикот од сообраќајни несреќи, пренесе „Танјуг“.