„Во последните 5 до 10 години сè повеќе деца се соочуваат со сериозни здравствени состојби и искривувања на ’рбетот кои се загрижувачки. Има сколиози кои барат дури и хируршки интервенции, додека, пак, кај кифозите и лордозите се бара сериозна работа во подолг временски период“, вели Илија Жежов – физиотерапевт специјалист по здравствен фитнес кој посочува дека секое трето дете се соочува со овие чести здравствени состојби. Тој сугерира дека во градинките и во училиштата треба да има физиотерапевт кој ќе работи навремено со децата
Најчестите деформитети кај децата се јавуваат поради неправилното држење на ’рбетот и слабата физичка активност. Како дополнителни посериозни причини за деформитетите на ’рбетот се телефоните и претешките ранци што ги носат во училиштата.
Како физиотерапевт кој речиси 20 години се бави со физиотерапијата, би кажал дека во последните 5 до 10 години сè повеќе деца имаат посериозни здравствени состојби и сериозни искривувања на ’рбетот. Има сколиози дури кои барат дури и хируршки интервенции, додека, пак, кај кифозите и лордозите се бара сериозна работа во подолг временски период.
Сколиозата, кифозата и лордозата се состојби што бараат посебно третирање и лекување, а речиси секое трето дете се соочува со овие чести здравствени состојби.
Кога сме кај телефоните, честа причини се токму мобилните. Правилното држење на ’рбетот е сведено на најниско ниво, така што речиси ниедно дете не седи во одредена правилна положба додека работи со својот мобилен телефон.
Што се однесува до ранците, сметам дека беспотребно е децата да носат претешки ранци во училиштата. Според мене, добро би било секое дете да има свое шкафче каде книгите ќе му бидат лесно достапни за предметот и за часот.
Што се однесува до физичката активност, вежбањето сè поретко е на потребното ниво и затоа овие состојби често се јавуваат кај децата.
Потребна е поголема мотивација од страна на родителите за физичка активност кај децата. Родителите мора да се оние што ќе ги форсираат своите деца за спорт и за пливање. Исто така, треба да се стави поголем фокус на редовните и почестите превентивни прегледи на состојбите со ’рбетот, како и навремено третирање на настанатиот здравствен проблем.
Често сугерирам дека како во градинките, така и во школите треба да има физиотерапевт и тој треба да работи навремено со децата. Многу е важно од најрана возраст на секое дете да му се дадат стручни вежби и стручен совет, препорака и понатамошна превенција во настанатиот здравствен проблем.
Со правилното држење на ’рбетот, додека децата работат на својот мобилен телефон, како и со редовната физичка активност и следењето од страна на физиотерапевтот, би се спречиле сегашните и понатамошните промени и состојби со ’рбетот.
Освен насоките за спорт и медицинската превенција, децата треба редовно да се едуцираат со одредени посети и работилници од страна на физиотерапевти во школите и градинките.
Сметам дека со ваквиот потег децата ќе бидат повеќе свесни да внимаваат на себе и на своето здравје, а со самите работилници и посетата на физиотерапевти, редовно ќе се откриваат честите сколиози, кифози и лордози. Со самото откривање ќе следува и брза рехабилитација кај настанатиот проблем кај детето.
(Авторот е специјалист по здравствен фитнес,
Ординација за физиотерапија ФИЗИОТЕРАПЕВТ-ЗДРАВЈЕ)
