Сите правни лица што создаваат отпад треба да склучат договор за комунални услуги согласно со член 6 од Законот за управување со отпад, се вели во известувањето на Друштвото за производство и комунални услуги „Саубермахер Тетово“.
– Со жалење констатираме дека по испраќањето на ова барање, во јавноста се појавија неточни информации и тенденциозни интерпретации на содржината на барањето, со кои се нарушуваат честа, угледот и добриот глас на „Саубермахер Тетово“ ДОО, како овластен давател на јавна комунална услуга на подрачјето на Општина Тетово. Се шират неточни тврдења дека компанијата врши т.н. рекетирање на деловните субјекти и на граѓаните, дека им се заканува на правните лица со изрекување казни и дека принудно бара склучување договор. Овие изјави се во целост невистинити и се особено загрижувачки, бидејќи не само што ја дезинформираат јавноста туку и дополнително го поткопуваат угледот на компанијата, која професионално ја извршува својата законска и договорна обврска на терен. Цврсто веруваме дека ваквите дезинформации произлегуваат од субјекти што и понатаму не сакаат да ги исполнуваат своите обврски за почиста животна средина – велат од „Саубермахер Тетово“.
Оттаму појаснуваат дека согласно со член 6 од Законот за управување со отпад, обврската за склучување договор се однесува на сите правни лица што создаваат комерцијален отпад, односно отпад што произлегува од деловна активност и е сличен по состав со отпадот од домаќинствата (хартија, амбалажа, пластика, храна итн.). Примери на комерцијален отпад се: канцеларискиот отпад (хартија, шишиња, пакувања); отпадот од трговијата и од угостителството (стакло, храна, картон); отпадот од козметичките, фризерските и од слични услуги; отпадот од пазарите, хотелите, мали сервисите, како и некои видови отпад од здравствените установи (ако не се класифицирани како опасни).
– Ги повикуваме сите правни субјекти да постапуваат согласно со законските обврски. „Саубермахер Тетово“, како кориснички ориентирана компанија што ја добила довербата од Општина Тетово за јавно-приватно партнерство за управување со комуналниот отпад, има обврска да ја извршува својата дејност согласно со законските обврски и во исто време да се грижи за заштитата на животната средина, со доследна примена на најдобрите стандарди за успешно корпоративно управување. Веруваме дека секој поединец и фирма на територијата на Општина Тетово, кои се добронамерни, ќе се придружат кон остварување на целите за почиста животна средина – велат од „Саубермахер Тетово“.
