„Фич“ ја зголеми прогнозата за раст на глобалната економија

Меѓународната агенција за кредитен рејтинг „Фич“ ја зголеми прогнозата за раст на глобалниот бруто домашен производ (БДП) од претходната прогноза, посочувајќи на забавување на американската економија и на пазарот на трудот.

Сепак, агенцијата соопшти дека очекува глобалниот економски раст значително да забави оваа година, во споредба со минатогодишните бројки.

Се очекува стапката на раст на глобалната економија да забави на 2,4 отсто оваа година, од 2,9 отсто минатата година и се очекува дополнително да се намали на 2,3 отсто следната година. Во извештајот, исто така, се забележува дека се очекува глобалната економија да порасне за 2,6 отсто во 2027 година.

Агенцијата соопшти дека има намалување на неизвесноста околу царинската политика на САД, по серијата најави.

Сепак, „поголемата јасност во врска со зголемувањето на царините во САД не го менува фактот дека тие се огромни и ќе го намалат глобалниот раст. А доказите за забавување во САД сега се појавуваат преку цврсти податоци; тоа повеќе не е само во анкетите за расположение“, рече Брајан Култон, главен економист во „Фич“.

„Фич“ забележа дека зголемувањето на инфлацијата што произлегува од зголемувањето на царините е скромно, додавајќи дека очекуваат подоцна оваа година да се забрза зголемувањето на инфлацијата.

– Повисоката инфлација ќе го намали растот на реалните плати и ќе го оптовари трошењето на потрошувачите во САД, кое веќе значително се забави во 2025 година. Проширувањето на фискалниот дефицит треба да ја поддржи побарувачката во 2026 година, но „Фич“ очекува просечната годишна стапка на раст на БДП во САД да остане далеку под трендот од 1,6 % следната година – се вели во извештајот.

Наведувајќи дека растот на работните места во САД е значително забавен, „Фич“ рече дека слабеењето на пазарот на трудот во САД треба да ги убеди Федералните резерви да ги намалат стапките побрзо отколку што се очекуваше претходно.

„Фич“ сега очекува намалување на стапката од 25 базични поени на состаноците на Федералните резерви во септември и во декември, со уште три намалувања на стапките следната година.