Најновите американски предлози за мировен план во Украина не вклучуваат барање Русија да ги повлече своите сили од регионите Донецк и Луганск, кои би ја формирале источната граница на потенцијална демилитаризирана зона, објави денес британскиот весник „Фајненшл тајмс“, повикувајќи се на висок украински функционер.
Според неименуваниот функционер, планот што се разгледува не бара руско повлекување, туку инсистира украинските сили да ги напуштат своите позиции во регионот Донецк.
Првичниот план од 28 точки на американскиот претседател Доналд Трамп предвидуваше создавање „неутрална и демилитаризирана тампон зона“ по повлекувањето на украинските сили од Донбас.
Украинските функционери вклучени во преговорите изјавија дека Вашингтон се залага за механизам споредлив со демилитаризираната зона што ги одделуваше двете Кореи повеќе од седум децении, објави британскиот весник.
Сепак, украинскиот претседател Володимир Зеленски верува дека таков механизам ризикува да го замрзне конфликтот и да ѝ даде време на Москва да се прегрупира пред евентуална нова офанзива.
Претседателот Зеленски неодамна објави дека украинските, европските и американските советници за национална безбедност ја завршиле својата работа на предложениот мировен план.
Овие документи, кои треба да послужат како основа за иден договор, моментално се подготвуваат како дел од трилатералните разговори.
