Одобрувањето на трговскиот договор меѓу Европската Унија и Соединетите Американски Држави, кој беше постигнат во јули, ќе биде суспендирано во Европскиот парламент, изјавија за Би-Би-Си извори блиски до Комитетот за меѓународна трговија на Европскиот парламент.
Одлуката за суспендирање наводно треба да биде објавена утре попладне во Стразбур.
Договорот меѓу претседателот на САД, Доналд Трамп, и претседателката на Европската комисија, Урсула фон дер Лајен, беше постигнат во јули на голф теренот на Трамп во Шкотска.
Со договорот се намалија американските царини за целиот увоз од Европската Унија на 15 проценти, што во тоа време се сметаше за добар договор, со оглед на тоа што Трамп претходно се закани дека ќе воведе царини за увоз од 30 проценти.
Сепак, договорот мора да биде одобрен од Европскиот парламент, а Комитетот за меѓународна трговија сè уште не ја завршил својата детална анализа.
Во саботата, само неколку часа откако претседателот Трамп се закани дека ќе воведе американски царини за Гренланд, влијателниот германски европратеник, Манфред Вебер, изјави дека „одобрувањето во овој момент не е можно“.
Додека договорот се финализираше, Европската Унија ги суспендираше своите контрамерки – царини за американска стока во вредност од 93 милијарди евра.
Таа суспензија истекува на 6 февруари, а без нејзино продолжување или парламентарно одобрување на договорот, царините на Европската Унија за американска стока ќе стапат на сила на 7 февруари.
