Европа под притисок: Како ќе одговорат сојузниците на ултиматумот на Трамп?

Американскиот претседател Доналд Трамп им упати ултиматум на сојузниците од НАТО во саботата, порачувајќи им во писмо дека САД ќе воведат „големи“ санкции врз Русија само кога тие ќе се обврзат на истите и ќе престанат да купуваат руска нафта. Исполнувањето на барањата на Трамп би претставувало голема промена во рамките на алијансата, а останува отворено прашање дали воопшто постои колективен интерес за преземање такви чекори, пишува СиЕнЕн.

„Подготвен сум да воведам големи санкции врз Русија кога сите земји од НАТО ќе се согласат и ќе почнат да го прават истото, и кога сите земји од НАТО ќе престанат да купуваат нафта од Русија“, објави тој на социјалните мрежи, цитирајќи писмо испратено до колегите од НАТО.

„Како што знаете, посветеноста на НАТО кон победа беше далеку помала од 100%, а купувањето руска нафта, според некои, беше шокантно! Ова во голема мера ја ослабува вашата преговарачка позиција и моќ над Русија. Во секој случај, јас сум подготвен да „тргнам“ кога ќе бидете и вие. Само кажете ми кога?“, додаде Трамп.
Претседателот на САД, исто така, ги повика членките на НАТО, како демонстрација на сила значително да ги зголемат царините за стоки од Кина. Тој верува дека руската војна во Украина би завршила „брзо“ доколку се преземат овие чекори.

„Верувам дека ова, плус НАТО, како група, со наметнување на царини од 50% до 100% за Кина, кои ќе бидат целосно повлечени по завршувањето на војната со Русија и Украина, исто така ќе бидат од голема помош во крајот на оваа смртоносна, но смешна војна“, рече тој.

Европската унија веќе воведе забрана за поморски увоз на руска нафта и нафтени деривати, но многу земји продолжуваат да увезуваат руски фосилни горива, вклучително и течен природен гас. Трамп претходно навести можност за дополнителни санкции и веќе ги удвои царините на Индија на 50% за купување руска нафта, признавајќи дека потегот „предизвикал раздор“.

Интересно е што тој не ја спомена Индија во својата порака до НАТО во саботата, иако претходно оваа недела побара од делегацијата на ЕУ да воведе царини и за Кина и за Индија. Со оглед на тоа што ЕУ е во завршна фаза од преговорите за трговски договор со Индија, малку е веројатно дека европските претставници би се согласиле.

Со обраќањето кон НАТО наместо кон ЕУ, Трамп ја вклучува Турција во своите барања, третиот најголем купувач на руска нафта по Кина и Индија, што дополнително ја нагласува сериозноста на неговите услови.

Во меѓувреме, Русија не покажува намера да ги намали тензиите. Министерството за одбрана на Романија во саботата соопшти дека пресретнало дрон што влегол во нејзиниот воздушен простор за време на руските напади врз Украина. Украинскиот претседател Володимир Зеленски рече дека дронот дејствувал во воздушниот простор на НАТО „околу 50 минути“.

Инцидентот следеше по упадот на руски беспилотни летала во полскиот воздушен простор претходно оваа недела, по што НАТО објави засилување на безбедноста на своето источно крило. Американскиот државен секретар Марко Рубио го нарече упадот во Полска „неприфатлив, несреќен и опасен развој на настаните“.