Лидерите на Европската Унија (ЕУ) се согласија да ѝ обезбедат на Украина огромен бескаматен заем за покривање на нејзините воени и економски потреби во следните две години, но не успеаја да ги премостат разликите и да одлучат за користење на замрзнатите руски средства за собирање средства.
Планот беше да се искористат дел од 210-те милијарди евра (246 милијарди долари) руски средства замрзнати во Европа, главно во Белгија.
Лидерите на ЕУ работеа доцна во четвртокот навечер за да ја уверат Белгија дека ќе ја заштитат од каква било руска одмазда доколку го поддржи планот за „заем за репарација“, но по повеќе од еден ден разговори на самитот во Брисел, тие се одлучија за поинаков заем.
„Имаме договор. Одлуката за обезбедување 90 милијарди евра (106 милијарди долари) за поддршка на Украина за 2026-2027 година е одобрена. Презедовме обврска, исполнивме“, изјави претседателот на Европскиот совет, Антонио Кошта, на социјалните медиуми.
Не сите земји се согласија со пакетот за заем. Унгарија, Словачка и Чешка се спротивставија на договорот, но беше постигнат договор во кој не го блокираа пакетот и им беше ветена заштита од какви било финансиски последици.
Унгарскиот премиер Виктор Орбан, кој е најблизок сојузник на рускиот претседател Владимир Путин во Европа и се опишува себеси како миротворец, рече: „Не би сакал Европската Унија да биде во војна“.
Францускиот претседател Емануел Макрон го нарече договорот голем чекор напред, велејќи дека задолжувањето на пазарите на капитал „беше најреалниот и најпрактичен начин“ за финансирање на Украина и нејзините воени напори.
Германскиот канцелар Фридрих Мерц, исто така, ја поздрави одлуката.
„Финансискиот пакет за Украина е финализиран“, рече Мерц во соопштението, истакнувајќи дека „на Украина ѝ е доделен заем со нула камата“.
„Овие средства се доволни за да се покријат воените и буџетските потреби на Украина за следните две години“, додаде Мерк.
Тој, исто така, рече дека замрзнатите средства ќе останат блокирани сè додека Русија не ѝ плати воени репарации на Украина.
По речиси четири години војна, Меѓународниот монетарен фонд проценува дека на Украина ќе ѝ бидат потребни 137 милијарди евра (161 милијарда долари) во 2026 и 2027 година.
Владата во Киев е на работ на банкрот и ѝ се потребни парите до пролет.
Зеленски им се заблагодарува на лидерите на ЕУ: Заедно ја браниме иднината на нашиот континент
Украинскиот претседател Володимир Зеленски им се заблагодари на лидерите на Европската унија (ЕУ) за нивната одлука да одобрат заем од 90 милијарди евра за Украина.
„Заедно ја браниме иднината на нашиот континент“, напиша Зеленски на X.
Зеленски, кој се залагаше за користење на замрзнати руски средства за финансирање на украинската одбрана, рече дека е важно тие „да останат замрзнати“.
