ЕУ удира на Шеин! Истрага за нелегални производи и „зависнички дизајн“

Европската Унија покренува формална постапка против модната платформа „Шеин“ за прв пат според правилата на Законот за дигитални услуги (DSA), а случајот би можел да стане преседан за целиот сектор за дигитална трговија.

Истрагата опфаќа потенцијална продажба на нелегални производи, вклучувајќи секс кукли слични на деца, но и поширокото прашање на таканаречениот „зависнички  дизајн“ и транспарентноста на алгоритмите што го обликуваат однесувањето на милиони корисници во Европа.

Во Брисел нагласуваат дека ова не е изолиран инцидент, туку тест за кредибилитетот на европската дигитална регулатива.

„Законот за дигитални услуги ги штити клиентите, се грижи за нивната благосостојба и им овозможува пристап до информации за алгоритмите со кои комуницираат. Ќе процениме дали „Шеин“ ги почитува овие обврски и својата одговорност“, изјави потпретседателката на Европската комисија, Хена Виркунен.

Пораката е јасна, законот што стапи на сила за ограничување на моќта на големите платформи сега влегува во фаза на конкретна имплементација. Најчувствителниот дел од истрагата се однесува на производите што би можеле да претставуваат материјал поврзан со сексуална злоупотреба на деца.

Во официјално соопштение, Комисијата наведе дека постапката се однесува на „продажба на нелегални производи во ЕУ, вклучувајќи содржина што би можела да претставува материјал за сексуална злоупотреба на деца, како што се секс кукли слични на деца“.

Иако правните квалификации на ваквите производи се разликуваат меѓу земјите-членки, европските институции сè повеќе заземаат унифициран пристап кога станува збор за заштита на малолетници и спречување на комерцијална нормализација на сексуализирани прикази на деца.

Шеин во официјална изјава изјави дека сака да обезбеди безбедна и сигурна онлајн средина и дека ќе учествува конструктивно во овој процес. Компанијата нагласува дека инвестира значителни ресурси во модерирање на содржината и отстранување на забранети производи и дека соработува со регулаторите.