Повеќето европски води се безбедни за пливачите, покажува новиот извештај на ЕУ за квалитетот на водата објавен во петокот.„Еуроњуз“ пишува дека повеќе од 85 проценти од испитаните локации ги исполнуваат најстрогите стандарди на ЕУ за одличен квалитет на водата за капење, а 96 проценти од сите официјално признати места за капење во ЕУ ги исполнуваат минималните стандарди за квалитет.
Оценката се базира на соодветноста на водите за капење, со посебен акцент на следење на бактериите што можат да предизвикаат сериозни болести. Беа оценети повеќе од 22.000 локации за капење во сите земји-членки на ЕУ.
За оние кои одат на одмор во Хрватска важно е да се напомене дека повеќе од 95 проценти од капалиштата се оценети како со одличен квалитет, како што е случајот и во Грција, Кипар, Бугарија и Австрија.
Крајбрежните води генерално се оценети подобро за пливање од местата за капење во реките и езерата, а само 1,5 проценти од местата за капење во ЕУ се оценети со слаб квалитет.
Минатата година, 89 проценти од крајбрежните подрачја за капење беа класифицирани како одлични. Од друга страна, 78 проценти од копнените плажи беа оценети како одлични. Квалитетот на водата за капење во Европа значително се подобри во последните децении. Причината за ова е големото намалување на органските загадувачи и патогените кои претходно се испуштаа во комуналните отпадни води.
Изворот истакнува дека за овој резултат придонесува систематското следење и управување со воведувањето на Директивата за вода и отпадни води, како и од големите инвестиции во општински постројки за третман на отпадни води и подобрувања во мрежите за одводнување на отпадни води.
Благодарение на овие напори, сега е сигурно можно да се плива во урбаните води и во водите што некогаш беа многу загадени. Директивата за вода за капење (BWD) се фокусира на следење на ешерихија коли и ентерококите. Ова се важни индикатори за фекално загадување, што претставува ризик за здравјето. Според извештајот, сè уште има значително загадување на површинските и подземните води.
