Ердоган: Израел ги злоупотребува нападите на Хамас за да изврши геноцид во Газа

Турскиот претседател Реџеп Таип Ердоган изјави дека израелската влада го злоупотребува терористичкиот напад на палестинскиот исламистички Хамас како изговор за да изврши геноцид во Газа, во својот говор пред Генералното собрание на Обединетите нации.

„Ова не е борба против тероризмот. Ова е политика на окупација, присилно раселување, протерување, геноцид или, поточно, политика на масовно убивање, спроведена под изговор на инцидентот од 7 октомври“, им рече тој на светските лидери собрани во Њујорк на Отворената дебата, пренесува „Хина“.

За време на својот говор, Ердоган покажа неколку фотографии од очајни Палестинци во Газа во центрите за дистрибуција на храна, гладни деца и уништувањето предизвикано од жестокото израелско бомбардирање на Газа во текот на изминатите две години. „Геноцидот продолжува во Газа“, рече Ердоган. „Дури и сега, додека се среќаваме, умираат невини луѓе“.

Ердоган предупреди дека „ова лудило го храни антисемитизмот“ и им порача на светските лидери дека молчењето во време на вакви злосторства е еднакво на соучество. „Мора да се договори прекин на огнот што е можно поскоро во Газа“, рече тој, додавајќи дека „геноцидниот тим“ одговорен за најновата криза „мора да биде повикан на одговорност“.

Ердоган го критикуваше израелскиот премиер Бенјамин Нетанјаху, велејќи дека нема интерес за мир и ослободување на преостанатите заложници во Газа.

Тој, исто така, се осврна на медиумското известување за војната, велејќи дека „досега Израел намерно убил 250 новинари кои работат за национални и меѓународни медиуми во Газа и забрани секаков влез во Газа“.

Специјалниот известувач на Советот за човекови права на ОН за слобода на изразување, Ирена Кан, исто така го обвини Израел за намерно убивање новинари за да ги прикрие своите злосторства. Израел, од друга страна, го обвинува Советот за човекови права на ОН и неговите известувачи дека се пристрасни.