Ентони Џошуа му одговори на Тајсон Фјури

Многумина љубители на боксот би сакале да видат голема британска пресметка меѓу Ентони Џошуа и Тајсон Фјури, но тој меч во моментов изгледа многу далечен, а според најновата изјава на „Кралот на Циганите“, борбата никогаш нема да се случи.

Со години се шпекулираше за потенцијален дуел меѓу Џошуа и Фјури, а по вториот пораз на Тајсон од Александар Усик минатата година, љубителите на боксот се надеваа дека конечно во 2025 година ќе се случи „Битката за Британија“.

Тие планови се променија кога Фјури во јануари го објави своето пензионирање, но многу фанови се надеваат дека тој ќе се предомисли и ќе се врати на боксот, како што направи неколку пати претходно.

Во последните недели кружат гласини дека поранешниот шампион на ВБЦ се вратил на тренинзите, но со неодамнешна објава на социјалните мрежи покажа дека нема намера да го заврши пензионирањето.

„Зошто би се вратил во рингот? Зошто би се вратил? Се пензионирав и останувам пензиониран. Немам што да докажам на никого, па зошто воопшто би размислувал да се вратам“, рече Тајсон Фјури.

Џошуа реагираше на изјавата на Фјури, објавувајќи фотографија на социјалните мрежи на која го гледа него во рингот и верува дека нивната борба ќе се случи.

„Еден од овие денови ќе стојам во спротивниот агол, подготвен и самоуверен“, рече Ентони Џошуа.