„Енергетската безбедност на Унгарија не е игра“: Шест единици го чуваат унгарскиот дел од Турскиот тек

Унгарскиот министер за национална одбрана Кристоф Салај-Бобровнички изјави дека Унгарските одбранбени сили ја зголемиле заштитата на унгарскиот дел од гасоводот Турски тек, со шест единици на копнени сили, како и воздушни патроли.

Салај-Бобровнички, исто така, изјави дека НАТО е постојано информиран за ситуацијата преку соодветни канали и дека Србија ќе продолжи со истрагата, објави унгарскиот „Индекс“.

„Енергетската безбедност на Унгарците не е игра! Унгарските одбранбени сили се подготвени целосно да ги спроведат своите задачи како што е наведено во Основниот закон“, рече Кристоф Салај-Бобровнички во видео на неговата страница на социјалните мрежи.

Министерот за одбрана додаде дека „зајакнувањето на безбедноста на критичните национални енергетски објекти започна пред неколку недели“ и дека „врз основа на информациите добиени од Србија, војската го дополни ова со зајакнување на заштитата на унгарскиот гасоводен систем“.

„Ви благодариме на нашите војници за нивната храброст за време на велигденските празници. Ќе ја заштитиме енергетската безбедност на Унгарија под сите околности“, заклучи унгарскиот министер за национална одбрана.

Во реонот на селата Велебит, Трешњевац и Војводa Зимоњиќ во општина Кањижа во Србија, во неделата беа пронајдени два големи пакети експлозиви со фитили, во близина на критичната гасна инфраструктура што ги поврзува Србија и Унгарија.

Унгарскиот премиер Виктор Орбан свика итен состанок на Советот за одбрана во неделата, по телефонскиот разговор со српскиот претседател Александар Вучиќ.

Орбан нареди унгарскиот дел од гасоводот Турски поток да биде ставен под воена заштита, што значи дека војници ќе го штитат гасоводот, „точките за пренос по целата должина од српско-унгарската до унгарско-словачката граница“.

Унгарскиот премиер го нарече инцидентот со откривањето експлозиви во близина на гасоводот во Кањижа чин на саботажа, додавајќи дека никој не е повреден и дека гасоводот работи без прекин.

Орбан нагласи дека Турскиот тек е од витално значење за Унгарија, бидејќи 60 проценти од потрошувачката на гас во Унгарија доаѓа преку овој гасовод, пренесува Танјуг.