Екстремните летни температури, долготрајната суша и пожарите скапо ги чинеа европските земјоделци – штетите се огромни

Екстремните горештини, долготрајната суша и шумските пожари предизвикаа штети во вредност од 14 до 17 милијарди евра во земјоделството на Европската унија ова лето, изјави европскиот комесар за земјоделство Кристоф Хансен.

Конечните загуби ќе бидат познати дури откако ќе заврши жетвата, рече Хансен по состанокот на министрите за земјоделство на ЕУ во Брисел.

Ова лето особено тешко ги погоди летните култури. Уште кон крајот на август, Европскиот заеднички истражувачки центар предупреди дека екстремните горештини и недостигот на вода во големи делови од Западна и Централна Европа драстично ги намалиле очекуваните приноси, при што во најтешко погодените области се забележани целосни загуби на културите.

Проблем е и недостигот на сточна храна

Сточарите исто така се соочуваат со големи проблеми, бидејќи сушата ја намали достапноста на трева и друга сточна храна.

Европската комисија претходно наведе дека горештините и сушата значително ја намалиле достапноста на пасишта и производството на биомаса во големи делови од Западна и Централна Европа. Хрватска беше меѓу земјите за кои беа намалени прогнозите за приносите на летните култури. Хансен смета дека Европа треба повеќе да инвестира во складирање на вода и во поефикасни, прецизни системи за наводнување за да се намали потрошувачката на вода.

Осигурени се само 12 отсто од производството

Комесарот исто така се заложи за поширока употреба на земјоделското осигурување.

Според него, моментално само околу 12 отсто од земјоделското производство во ЕУ е осигурено од штети. Тој смета дека поголемата покриеност со осигурување би им овозможила на земјоделците полесно да се опорават по екстремни временски настани и би ги олеснила новите инвестиции.

Прашањето за осигурување стана дел од поширока дискусија во рамките на Европската комисија. Во средината на септември, претседателката на Комисијата, Урсула фон дер Лајен, најави формирање на Алијанса за климатско осигурување и нови мерки за намалување на значителниот јаз меѓу вкупните загуби поврзани со климата и износите покриени од осигурителните компании.

Фон дер Лајен најавува нова иницијатива за водата

Во своето обраќање за состојбата на Унијата, Фон дер Лајен најави и нова европска иницијатива за водата. Таа предупреди дека недостигот на вода претставува закана за земјоделството, енергетскиот сектор и синџирите на снабдување, и најави предлози за подобро управување со ризиците во земјоделството. Истовремено, Комисијата подготвува европски план за справување со топлотни бранови. Според податоците на Комисијата, овогодишните повторливи топлотни бранови беа проследени со изразен недостиг на врнежи и рекордно ниски водостои на некои од поголемите европски реки, додека летните култури во најтешко погодените делови на Европа предвреме созреаа и дадоа значително помал принос, пренесе „Хина“.