Гласни експлозии и силно пукање се слушнаа синоќа и утрово во близина на главниот аеродром во Нијамеј, главниот град на Нигер, објавија граѓаните.
Видео снимките покажуваат силни експлозии и осветлување на небото, кои почнаа околу полноќ и траеја околу два часа во областа на меѓународниот аеродром Диори Хамани, кој е исто така клучен центар за војската на Нигер.
АП известува дека не може независно да ги потврди видео снимките, на кои се прикажани и воени камиони и пожари.
Сè уште не е познато што довело до експлозиите и пукањата и дали имало жртви или штети.
Се чини дека сè се смири утрово, објавува АП.
Меѓународниот аеродром во Нијамеј, исто така, има воена база и таму се чува пратката ураниум од рудниците во Нигер, наменета за извоз.
Агенцијата Анадолу ја објави изјавата на функционерот на Министерството за надворешни работи дека ситуацијата сега е под контрола, објави BBC.
„Ситуацијата е под контрола. Нема причина за загриженост“, објави новинската агенција Анадолу. Функционерот изјави за агенцијата дека се обидуваат да утврдат дали пукањето е поврзано со пратка ураниум. Нигер е предводен од Абдурахман Тиани, кој ја презеде власта во 2023 година со државен удар со кој беше соборен избран цивилен претседател.
Како и западноафриканските соседи Буркина Фасо и Мали, земјата се бори со џихадистички групи кои извршија смртоносни напади низ целиот регион.
Земјата е исто така водечки производител на ураниум. Огромна пратка ураниум наменета за извоз се наоѓа на аеродромот поради нерешени правни и дипломатски компликации со Франција откако воената влада ги национализираше рудниците за ураниум во земјата.
