Екоразмена „На ти го, дај ми го“

Организацијата „Екосвест“ ја организира првата екоразмена „На ти го, дај ми го“, уникатен настан посветен на одржливоста, заедништвото и на креативната размена.

Настанот ќе се одржи утре, во „Собрание бистро“, со почеток во 12:00 часот и е отворен за сите што сакаат да им дадат нов живот на старите предмети што веќе не ги користат.

– Концептот е едноставен, но инспиративен: секој учесник може да донесе до пет предмети (облека, книги, модни додатоци, ситни апарати или други употребливи предмети) и за секој донесен предмет да добие купон за размена. Со тој купон може да избере нешто донесено од друг учесник – ново мало богатство што чека да биде откриено – соопштија од „Екосвест“.

Оттаму додаваат дека сите предмети треба да бидат чисти, зачувани, а доколку станува збор за електронски уреди – функционални.

– Како мал знак на благодарност за учеството, секоj учесник ќе добие бесплатно кафе, затоа што секоја добра размена започнува со пријатен разговор и со топол пијалак – нагласуваат од „Екосвест“.

Од организацијата велат дека овој настан е инспириран од слични практики во светот, кои ја промовираат културата на повторна употреба и одржлив животен стил и додаваат дека со „На ти го, дај ми го“, „Екосвест“ има цел да ја внесе оваа позитивна навика во македонското секојдневие.

– Често ми се случувало да видам уникатно парче облека и да дознаам дека е рачна изработка или стар модел од некоја претходна сезона. Денешната глобална мода нè тера сите да изгледаме слично, но токму секд хенд парчињата и размената носат посебен шарм и автентичност. Со овој настан сакаме да потсетиме дека не мора секогаш убавината да биде нова, таа може да биде обновена, прераскажана и споделена – вели Искра Манојлоска, координаторка за комуникации во „Екосвест“.

Таа наведува дека екоразмената е повеќе од обична размена.

-Таа е можност да се запознаете со луѓе кои размислуваат слично, да најдете неочекувани модни парчиња или предмети со приказна, и да дадете свој мал придонес за позелена иднина- заклучи Манојлоска.

(А. П.)