Еднократна парична помош за глувонемите лица во Центар

Општина Центар ќе доделува еднократна парична помош за глувонемите лица во Центар.

Ова било договорено на средбата меѓу градоначалникот Горан Герасимовски и претставниците на Сојузот на глуви и наглуви – Даре Џамбаз.

Од Општина Центар информираат дека на средбата се разговарало за актуелните потреби и предизвици со кои се соочуваат овие лица, како и за можностите за понатамошна поддршка од страна на општината.

Притоа, Герасимовски најавил дека еднократната парична помош за глувонемите лица ќе се доделува еднаш годишно.

– Центар е една од ретките општини која обезбедува лични асистенти и финансиска поддршка за децата и семејствата кои имаат таква потреба. Со оваа нова мерка ќе покажеме дека секој наш сограѓанин е важен и дека заедно градиме општество на еднакви можности. Од следната година, глувонемите лица ќе добиваат еднократна парична помош. Како општина обезбедивме бесплатен паркинг за глувонемите и ме радува тоа што се задоволни од оваа мерка  – изјави Герасимовски.

На средбата било договорено во септември да се одржи нова, на која дополнително ќе се разгледаат предлози и барања од здруженијата, со цел тие да се вградат во програмите на Општина Центар.