Естонија, лидер во тестирањето на Пиза, од септември оди во спротивна насока од другите европски земји, охрабрувајќи ги учениците да користат мобилни телефони и вештачка интелигенција на час, сето тоа со цел подобрување на учењето и резултатите. Естонските ученици ќе ги добиваат своите задачи со вештачка интелигенција. Естонија е прва во Европа по математика, наука и креативно размислување, а втора по читање, според најновата оценка на програмата Пиза.
Балтичката земја се издвојува по прифаќањето на дигиталната технологија, и додека другите земји ја забрануваат и ограничуваат употребата на мобилни телефони во училиштата, наставниците во Естонија активно ги охрабруваат учениците да ги користат како алатки за настава.
Естонската министерка за образование Кристина Калас изјави за време на неодамнешната посета на Лондон за Светскиот образовен форум дека знае дека повеќето европски земји гледаат на паметните телефони и другата технологија со претпазливост.
„Во Естонија, ние генерално сме многу поотворени и подготвени да користиме дигитални алатки, а наставниците не се поинакви“, рече таа.
Естонија сега започнува нова национална иницијатива, AI Leap, која ќе ги опреми наставниците и учениците со најсовремени алатки и вештини за вештачка интелигенција.
Тие ќе почнат да добиваат такви средства од септември, а до 2027 година, 58.000 ученици и 5.000 наставници треба да ги добијат. Официјалните лица велат дека благодарение на оваа иницијатива, Естонија ќе стане една од најпаметните нации во начинот на кој ја користи вештачката интелигенција, според The Guardian.
