Еден од Вини и Алонсо е вишок

Односот помеѓу Винисиус Жуниор и Чаби Алонсо е сериозно нарушен и тие повеќе нема да можат да функционираат заедно.

Бразилецот јавно го искажа своето незадоволство од одлуката на Чаби Алонсо да го извади пред да заврши последното „Ел Класико“. Тој му врескаше на тренерот на средина од теренот и покрај клупата, и извика дека сака да го напушти клубот.

Извори блиски до Реал тврдат дека „кралскиот клуб“ е подготвен да го санкционира однесувањето на бразилската ѕвезда, дека е можна финансиска казна или барем строго предупредување.

Шпанските медиуми откриваат дека се сериозно затегнати односите меѓу двете страни и дека ситуацијата е повеќе од сериозна.

„Винисиус Жуниор повеќе не му верува на Чаби Алонсо“, објавува „Ел Ларгеро“, и продолжува да изнесува неверојатни тврдења.

„Тие повеќе не зборуваат. Винисиус веќе му кажал на својот агент дека сака да го напушти Реал (М) ако тренерот не го смета за недопирлив. Ако нешто не се промени, тој нема да потпише нов договор. Ако ситуацијата остане каква што е, малку е веројатно дека двајцата ќе бидат дел од клубот. Едниот од нив ќе биде вишок“, тврди истиот извор.

Винисиус и Реал со месеци разговараат за продолжување на нивната соработка, која истекува во летото 2027 година, но се уште нема договор.

Проблемот се парите. Бразилецот бара плата во опсегот на Килијан Мбапе, односно околу 30 милиони евра годишно, додека клубот нуди нешто над 20 милиони.

Сериозните проблеми во разговорите и арогантното однесување на Бразилецот, доведоа до фактот дека Реал сериозно ќе ја разгледа неговата продажба. Бразилецот е член на „кралскиот клуб“ од 2018 година, одигра 335 натпревари и има учинок од 111 голови и 87 асистенции.

Чаби Алонсо го презеде Реал (М) ова лето. Тој имаше навистина одличен почеток и го оживеа тимот кој минатата сезона ја заврши во очај и без трофеј.

Сè изгледа многу подобро со него и сигурно е дека раководството на „кралскиот клуб“ не размислува да го отпушти овој стручњак поради Винисиус.