Индиската влада размислува да ја приземји својата флота авиони „Боинг 787-8“, еден ден по сериозната авионска несреќа во која загинаа 241 од 242 патници и членови на екипажот, соопштија денес неименувани добро информирани извори.
Флотата најверојатно ќе биде приземјена за да се испита безбедноста на овој авион од американско производство, велат изворите, додавајќи дека се во тек разговори меѓу Индија и американските агенции за ова прашање, објави индиската телевизиска станица Ndtv.
Покрај тоа, можно е да се испита и стандардната постапка за одржување на „Ер Индија“, чиј авион се урна само неколку минути по полетувањето.
Официјалните лица изјавија дека авионот почнал да губи висина кратко по полетувањето пред да се сруши во станбена зона.
Авионот, кој летал од Ахмедабад до Лондон, се урнал во густо населена станбена област, предизвикувајќи пожар и голем број цивилни жртви на земја, вклучувајќи неколку студенти кои биле во блискиот дом на медицинскиот факултет. Експертите за воздухопловство изјавија дека е можно да имало недостаток на моќност кај двата мотори и дека една од можните причини е удар од птици. „Боинг“ во соопштението наведува дека е во контакт со „Ер Индија“ и дека е подготвен да ја обезбеди потребната поддршка.
Боинг 787 Дримлајнер се користи на меѓународни летови, а неговиот дизајн овозможува 20 проценти поголема ефикасност на горивото, објави Ројтерс. Првиот комерцијален лет на овој авион беше на 26 октомври 2011 година, а го изврши јапонската компанија „Ол Нипон Ервејс“ на рутата од Хонг Конг до Токио.
Оттогаш, Дримлајнерот има завиден рекорд во тоа што до вчера не доживеал ниту една фатална несреќа, според Ндтв. Моментално има три модели во серијата „Боинг 787“, од кои 787-8 е најмалиот и првиот што влезе во употреба.
Овој авион може да превезува 248 патници, а Боинг има продадено повеќе од 2.500.780 од овие авиони, од кои Ер Индија купи 47. Боингот 787 може да има два вида мотори произведени од компанијата или Ролс-Ројс.
Моторите на авионот што се урна вчера беа произведени од GE Aerospace, која објави дека ќе ја поддржи истрагата.
