ЕЦБ: Банките од еврозоната мора да ја зголемат ликвидноста во долари

Банките од еврозоната треба да ја зголемат ликвидноста во долари за подобро да се справат со можните ненадејни промени во девизните курсеви и да ги ублажат ризиците, предупреди Европската централна банка (ЕЦБ), пренесе „Хина“.

Во мај, ЕЦБ предупреди дека „ненадејните промени во царинската политика на САД, како дел од пошироките промени во геополитичката средина, со економски и финансиски последици“, би можеле да ја „тестираат“ финансиската стабилност на еврозоната во иднина.

Инвеститорите во некои случаи „нетипично“ повлекле пари од средства кои традиционално се сметаат за безбедни, како што се американските државни обврзници и долари, изјавија експертите од ЕЦБ во извештај објавен во мај.

Некои банки во еврозоната „имаат силни меѓународни врски“ бидејќи посредуваат во добивање ликвидност во долари, но пазарот досега функционира правилно и нема индикации за проблеми во пристапот до финансирање во странска валута преку репо договори и девизни свопови, и покрај осцилациите во другите пазарни сегменти, проценија тие во тоа време.

Неизвесноста создадена од трговските мерки се намали од април, но сè уште не е целосно стивната и би можела повторно да се интензивира, заклучи потпретседателот на ЕЦБ, Луис де Гиндос, во најновиот извештај за финансиска стабилност.

ЕЦБ предупредува дека банките можеби ќе имаат потреба од повеќе простор за маневрирање за да апсорбираат посилни валутни осцилации и да го ублажат ризикот што произлегува од нивната улога како посредници на финансиските пазари.

„Банките треба да чуваат ликвидни средства во американски долари за да го амортизираат одливот и да дејствуваат како стабилизирачки посредник“, порачаа од ЕЦБ.

Американските пазари на капитал „во голема мера“ ги обликуваат глобалните услови за финансирање бидејќи САД го поставуваат глобалниот праг на реалните каматни стапки, се вели во извештајот.

Во таква средина, ризиците за финансиската стабилност на еврозоната би дошле од хаотични флуктуации на девизниот курс и негативно влијание врз конкурентноста на еврозоната во светската трговија, со ненадејни промени во трошоците за финансирање за владите, компаниите и банките.

Доларот ослабе во меѓувреме, со паралелно зголемување на приносите на американските државни обврзници, што го поставува прашањето дали средствата деноминирани во долари го менуваат својот статус како безбедно засолниште за капиталот.

„Од особена важност за финансиската стабилност на еврозоната е фактот што инвеститорите во еврозоната поседуваат еквивалент на шест трилиони евра во хартии од вредност деноминирани во долари“, нагласија експертите од ЕЦБ.

ЕЦБ наведува дека банките мора да „одржуваат соодветни капацитети на билансот на состојба“ за да служат како амортизери.

Меѓу ризиците за финансискиот систем, авторите на извештајот уште еднаш ги истакнуваат надуените цени на акциите, високиот долг, царинските давачки и посебните видови криптовалути, таканаречени стабилни монети, кои се сè попопуларни, пренесе „Ројтерс“.

Препораките наведени во извештајот не се обврзувачки за банките под надзор на ЕЦБ, додаде „Ројтерс“.