Двете лица, уапсени поради руски паравоени кампови за обука на Молдавци и Романци во Србија, се поранешни соработници на министерот Ненад Поповиќ

Двајца мажи беа уапсени во Шабац под сомнение дека се поврзани со финансирање и организирање на руски паравоени кампови за обука на Молдавци и Романци. Во исто време, молдавското обвинителство објави дека неколку дена пред парламентарните избори во таа земја, уапсило 74 лица осомничени за обука за предизвикување немири во Молдавија пред изборите во недела. Според Бирн, уапсените лица некогаш соработувале со Ненад Поповиќ, сегашниот министер без ресор, пишува Н1.

Молдавското обвинителство тврди дека Русите ги обучувале Молдавците да предизвикуваат немири во пресрет на изборите и дека сето ова се случило, како што велат, во кампови во Србија.

Затоа, неколку дена пред парламентарните избори во Молдавија, беа приведени седумдесет и четири лица, осомничени дека биле обучени во Србија за предизвикување немири во земјата.

Видео објавено од молдавските судски власти под наслов – „Воени логори во Србија организирани од руски тајни служби“ – го прикажува апсењето на неколку лица, како и внатрешната преписка на осомничените, запленети пари, униформи, оружје и експлозиви, а наводно биле вклучени и руски разузнавачки агенти, објави молдавското обвинителство за борба против организираниот криминал.

Молдавската претседателка Маја Санду одговори на ваквите обвинувања. Таа изјави дека Кремљ со тоа ја загрозува независноста и европската иднина на земјата.

Русија, од друга страна, ги негираше ваквите обвинувања, тврдејќи дека Санду „поттикнува антируски чувства со цел да освои гласови“. Додека Европската комисија чека независна истрага, пристигна соопштение од Дирекцијата за криминална полиција на Србија за апсењето на две лица.

„Уапсените Л. П. (37) и С. С. (47) се обвинети за организирање борбено-тактичка обука за граѓани на Молдавија и Романија, која, според сомневањата, имала за цел да ги обучи за поефикасно пружање физички отпор на молдавските полицајци во случај на немири за време на денот на изборите во таа земја, закажани за 28 септември оваа година“, се вели во соопштението.

Како што објавува „Бирн“, уапсениот Лазар Поповиќ некогаш бил советник на Ненад Поповиќ, сегашниот министер без ресор задолжен за меѓународна економска соработка и општествената положба на црквата во земјата и во странство.

Саво Стевановиќ бил и член на партијата на Ненад Поповиќ, а потоа преминал во политичката фракција на градоначалникот на Чајетина, Милан Стаматовиќ.

И ова не е прв пат молдавските власти да го вперат прстот кон земјите од Западен Балкан. Пред претседателските избори и референдумот за пристапување во ЕУ во 2024 година, тие тврдеа дека идентификувале неколку стотици млади луѓе, наводно обучени во Русија, Босна и Херцеговина (БиХ) и Србија, за да ја дестабилизираат Молдавија.