Анимираниот филм „Неми филмови“ на Крсте Господиновски освои две нови награди на меѓународни фестивали.
Станува збор за наградата за Најдобар интернационален краток филм на Меѓународниот фестивал за краток филм „Вижн“ во Кемерово, Русија и Почесно признание на Меѓународниот фестивал за анимиран филм „Куанду“ во Тајпеј, Тајван.
Ова е втора по ред награда во Русија и втора награда во Тајван, по октомвриската награда на престижниот „ТИАФ“ кој се одржува во Тајчунг.
Да потсетиме, во септември филмот ги освои наградата Гран-при на Меѓународниот фестивал за анимиран филм „Аниматор фест“ во Јагодина и наградата од домашната публика на Меѓународниот фестивал за краток филм „Ѕирни“ во Скопје.
Од премиерата на фестивалот „Анеси“ во јуни, „Неми филмови“ досега е прикажан на 28 меѓународни фестивали и има освоено 7 награди.
Филмот е во продукција на „Фокус покус“ и во копродукција на „Флипбук продакшнс“, а е поддржан од Агенцијата за филм.
