Две илјади луѓе се боцнаа на првиот ден од вакцинирањето

За бесплатно вакцинирање против сезонски грип според последните податоци од Министерството за здравство досега се пријавени околу 49 илјади граѓани, а вчера на првиот ден се вакцинираа над две илјади луѓе. Кампањата за имунизација на населението од здравствено ризичните категории ја почна министерот за здравство Азир Алиу кој беше во посетата на Одделението за епидемиологија во Гостивар, и ја прими вакцината против сезонски грип.

„Во мојот роден Гостивар, се вакцинирав и преку мојот личен пример сакам да ја истакнам важноста од навремена вакцинација, како најефикасна превентивна мерка за заштита на здравјето. Апелирам граѓаните навреме да се заштитат од сезонскиот грип, а тоа особено да го направат лицата што спаѓаат во ризичните групи“,изјави Алиу и ги повика граѓаните да се пријават за вакцинација против сезонски грип преку апликацијата vakcinacija.mk или кај својот матичен лекар.

Вакцинацијата против сезонски грип се спроведува на 35 вакцинални пункта низ државата, од кои пет се во Скопје. Министерот оцени дека бројката на досега пријавените за вакцинација ја покажува зголемената свесност за значењето за заштита од грип, со што се потврдува важноста и потребата од оваа превентивна мерка. Министерството за здравство годинава набави најголем број вакцини против сезонски грип – 80 000 дози четиривалентна вакцина од реномираниот производител „Абот“ од Холандија“.

Со бесплатна вакцинација се опфатени ризичните категории население, како повозрасни лица над 65 години, лица со хронични заболувања, здравствени работници, бремени жени, деца на возраст од шест месеци до пет години, како и лица сместени во старски домови и вработени во овие установи. (П.А.)