Двајцата коцкари од НБА нема да примаат плата додека се под истрага од ФБИ

Американскиот кошаркар Тери Розиер нема да добива плата од тимот на Мајами додека е на отсуство поради апсење по федерални обвиненија поврзани со неговата вмешаност во скандал со обложување, изјавија за „Асошиејтед прес“ два извора запознаени со ова прашање.

Платата на Розиер, која изнесува околу 26,6 милиони долари за оваа сезона и се исплаќа на рати, од кои првата требаше да се исплати на крајот од оваа недела, ќе биде суспендирана додека не се завршат судските постапки, велат изворите, зборувајќи под услов на анонимност бидејќи деталите не се објавени.

Еден од изворите додаде дека Мајами нема да добие веднаш олеснување според ограничувањето на платите во НБА. Доколку Розиер биде ослободен од обвиненијата и лигата му дозволи да се врати, тој би можел да ги добие задржаните плаќања во целост ретроактивно.

Тренерот на Портланд, Чонси Билапс, кој исто така е суспендиран поради сомнение за вмешаност во нелегално обложување, е во слична ситуација. Неговата плата ќе биде привремено задржана, а тој е под договор барем до сезоната 2026/27. Клубот одби да коментира за ситуацијата, како и Мајами.

Розиер поседува куќа во округот Бровард, Флорида, каде што редовно се плаќаат неговите даноци на имот. Даночната пријава е поднесена во тој округ, на околу 50 километри од арената во Мајами.

Кошаркарот играше за Шарлот во 2021 година, а сега е член на Мајами. Тој, тренерот Билапс и околу 30 други беа уапсени минатата недела врз основа на обвинение во кое се детално опишани нелегални активности за обложување.

Федералните обвинители тврдат дека Розиер учествувал во шема во која неговите познаници профитирале обложувајќи се на неговиот настап на натпреварот против Шарлот на 23 март 2023 година. Во тој натпревар, во кој играл ограничено, облозите за неговиот „слаб настап“ добиле победа.

Обвиненијата против Розиер се слични на оние претходно поднесени против поранешниот играч на Торонто, Џонтеј Портер, кој беше доживотно суспендиран од комесарот на НБА, Адам Силвер, минатата година.