Прославите и немирите што следеа по победата на ПСЖ во финалето на Лигата на шампионите одзедоа два живота и повредија 192 лица. 426 лица беа уапсени во врска со немирите, објави француската полиција во недела наутро, како што објавија француските медиуми.
Во Дакс, 17-годишна тинејџерка почина откако беше избодена во градите. Осомничениот е во бегство.
Во Париз, 20-годишна девојка која возеше скутер, исто така, го загуби животот откако беше удрена од возило со навивачи.
Прославата на победата на ПСЖ беше обележана со бројни инциденти на неколку локации во градот, вклучувајќи ги Шанзелизе, париската обиколница и квартот Порт де Сен-Клу, објави францускиот BFM.
Според податоците од париската полиција, многу од уапсените поседувале пиротехника и запаливи материјали. На некои места избувнаа судири со полицијата, а беа употребени и водни топови и солзавец.
Демонстрантите го пробија полицискиот кордон на Плоштадот Етоал, а еден автомобил беше запален на Шанзелизе, а продавница за чевли беше ограбена. Во Порт де Сен Клу, два автомобила беа запалени, а автобуската станица беше вандализирана, а полицијата интервенираше со солзавец.
Министерот за внатрешни работи Бруно Ретајо остро го осуди насилството.
„Вистинските навивачи слават, додека варварите го уништуваат градот и ја провоцираат полицијата“, рече тој на мрежата „Икс“.
Илјадници навивачи учествуваа во прославата, а Ајфеловата кула беше осветлена во боите на клубот. И покрај инцидентите, атмосферата остана празнична на многу места.
Околу 5.400 полицајци и жандармериски службеници беа распоредени за одржување на редот, изјави шефот на париската полиција Лоран Нуњез.
Фудбалерот на ПСЖ, Усман Дембеле, апелираше до навивачите да останат смирени: „Славиме, но без насилство“, рече тој.
Парадата на шампионите е планирана за наредните денови, а се очекува играчите на ПСЖ да бидат пречекани на Шанзелизе во 17 часот. Фудбалерите на ПСЖ станаа европски шампиони за прв пат во историјата, победувајќи го Интер со 5-0.
