Дронови ја затворија руската платформа за производство на нафта

Дронови со долг дострел на украинскиот Центар за специјални операции „Алфа“ на Безбедносната служба на Украина (СБУ) ја погодија платформата за производство на нафта „Филановски“, во сопственост на компанијата „Лукоил-Нижневолжкнефт“, тврди извор во СБУ.

Според него, ова е прв напад од страна на Украина врз руската инфраструктура за производство на нафта во Каспиското Море, пренесува Укринформ.

„Најмалку четири удари се регистрирани на офшор платформата. Како резултат на нападот, производството на нафта и гас од повеќе од 20 бушотини што ги опслужува е суспендирано“, рече изворот.

„СБУ продолжува со успешните специјални операции против рускиот нафтен и гасен сектор, постојано проширувајќи ја нивната географија. „Бавовна“ во Каспиското Море е уште еден потсетник за Руската Федерација дека сите нејзини претпријатија што работат за војна се легитимни цели. Каде и да се“, нагласи изворот на СБУ.

Полето Филановское е едно од најголемите истражени во Русија и во рускиот сектор на Каспиското Море.

Нејзините резерви изнесуваат 129 милиони тони нафта и 30 милијарди кубни метри гас.

Еден ден претходно, беспилотните летала на морнарицата на СБУ „Си бејби“ го погодија танкерот за нафта „Дашан“ во Црното Море, кој припаѓа на руската „флота во сенка“, објави Танјуг.