Драматични сцени од Киев: Руски дрон се заби во облакодер/ВИДЕО

Руски дронови го нападнаа Киев во текот на ноќта и утрото на 21 октомври. Според градските власти, нападите погодиле 24-катна станбена зграда и транспортна инфраструктура, а во еден дел од градот се запалиле паркирани автомобили.

Градоначалникот на Киев, Виталиј Кличко, соопшти дека руско беспилотно летало удрило во 19-тиот кат од станбена зграда во областа Свјатошински. Избувнал пожар, а на лице место биле испратени службите за итни случаи.

Претходно, Кличко извести и за напад врз објект од транспортната инфраструктура во областа Соломјански.

„Беспилотно летало удри во објект од транспортната инфраструктура во областа Соломјански. Избувна пожар. Службите за итни случаи се на лице место“, изјави градоначалникот, пренесува „Украинска правда“.

Нападите започнаа вечерта на 20 октомври. Во 23:41 часот, Воената управа на градот Киев соопшти дека остатоци од беспилотно летало паднале на отворен простор во областа Свјатошински. Според првичните информации, во тој инцидент немало повредени.
Утрото, Кличко објави дека беспилотно летало паднало врз паркирани автомобили во областа Десњански. Градската воена управа подоцна потврди дека возилата се запалиле.

“Frankly normal” morning in Kyiv.

The moment a russian drone strikes a residential building. https://t.co/6PvrXzdFiW pic.twitter.com/vZ6IzamWpi

— UAVoyager🇺🇦 (@CrimeanVoyager) October 21, 2026

Градоначалникот, исто така, извести за пад на беспилотно летало на отворен простор во областа Соломјански, каде што, според првичните информации, не избувнал пожар.

Околу 07:00 часот наутро беше пријавен нов напад врз станбена зграда. Засега нема потврдени информации за жртви во тие утрински инциденти.

Нападите на 21 октомври се случија само еден ден откако руското бомбардирање на Киев однесе еден човечки живот, а 21 лице беа повредени, според претходните извештаи на украинските медиуми.

Серијата напади со беспилотни летала дополнително ги загрози жителите на украинската престолнина, а обемот на штетата и можните нови жртви сè уште се утврдуваат.