Лаптоп на патник се запалил за време на лет на American Airlines од Атланта кон Далас, при што неколку патници се здобиле со изгореници. Авионот безбедно слетал, а еден патник добил медицинска помош по слетувањето.
Инцидентот се случил на летот 2398 на „Американ Ерлајнс“ (American Airlines), кој во петокот летал од Атланта, Џорџија, кон Далас, Тексас. Пилотот преку комуникацијата со контролата на летање пријавил „пожар во задниот дел од кабината“, додека членовите на екипажот се обидувале да го стават уредот под контрола.
„Мислам дека имаме четири до пет патници кои се здобиле со изгореници од лаптопот“, рекол пилотот, според аудиоснимката од комуникацијата објавена од CBS News.
Авионот безбедно слетал на Меѓународниот аеродром Далас-Форт Ворт, каде што го пречекале итните служби, што е стандардна процедура во вакви ситуации. На еден патник му била укажана медицинска помош, но немало потреба од хоспитализација.
Од American Airlines потврдиле дека екипажот пријавил чад кој доаѓал од уред на патник и ја пофалиле брзата и професионална реакција на екипажот.
Инцидентот повторно го актуелизира прашањето за безбедноста на литиумските батерии, кои се користат во лаптопи, мобилни телефони, преносни полначи и други електронски уреди. Американската Федерална управа за воздухопловство (FAA) предупредува дека овие батерии можат да се прегреат поради оштетување, контакт со вода, преполнување или неправилно пакување.
Според податоците на FAA, годинава се регистрирани 58 потврдени инциденти во авиони поврзани со литиумски батерии, вклучително и случаи на чад, пожар и екстремно загревање. Во текот на последните 20 години, во 84 регистрирани случаи биле вклучени лаптопи.
FAA им препорачува на патниците електронските уреди и резервните литиумски батерии да ги носат во рачниот багаж, а не во чекираниот багаж.
Слични инциденти се случиле и претходно. Во мај, лет на EasyJet од Египет кон Велика Британија бил пренасочен кон Рим, откако во багажот на патник била пронајдена батерија за преносен полнач (power bank) која се полнела. Летот продолжил дури следниот ден.
Британската Управа за цивилно воздухопловство предупреди дека преносните полначи, поради литиумските батерии што ги содржат, претставуваат сè поголем ризик од прегревање и пожари во воздушниот сообраќај и ги повика патниците на дополнителна претпазливост.
