Дождот им помогна на пожарникарите, изгаснат пожарот во „Јасен“

Дождот што заврна пред седум часот утринава и врнеше нешто повеќе од два часа на подрачјето на ловиштето „Јасен“, помогна пожарот што трае повеќе од десетина дена да биде изгаснат, информираа од Дирекцијата за заштита и спасување (ДЗС).

– Но и покрај поголемото количество заврнат дожд, на некои места од пожарната линија сè уште може да се забележи чадење, поради што по кревањето на маглата и чадот, ќе продолжиме со пешадиско дејствување врз жешките точки што покажуваат знаци на горење. Овој терен ќе биде пребаран и со дронови со термални камери. Екипи на ЈП „Јасен“ продолжуваат со патролирање сè додека не се потврди дека пожарот е целосно изгаснат, истакна директорот на ДЗС, Стојанче Ангелов. 

Од ДЗС апелираат граѓаните да бидат внимателни, со цел да не предизвикаат пожар, како и да го пријават секое сомнително однесување.

– Доколку граѓаните забележат електрични жици што се допираат или искрат, веднаш да пријават во „ЕВН“ или на бројот 112 – наведуваат од ДЗС.

Според информациите на Центарот за управување со кризи (ЦУК)  до 12:00 часот на територија на цела држава биле регистрирани вкупно девет пожари на отворен простор, од кои два се активни, еден е под контрола, а шест се изгаснати.

Активни пожари има во општина Прилеп, кај село Беловодица – место викано Ливада и селото Лењиште, каде е зафатена букова шума и во општина Долнени, кај селата Стровија и Долгаец, каде гори мешана шума.

Во Скопскиот Регион се изгаснати пожарите на територија на општина Сопиште: кај браната на езерото Козјак  и во општина Студеничани – селата Горно Количани и Драчевица – планински врв Китка. Изгаснати се пожарите и во општина Кичево – село Душегубица, општина Велес – село Клуковец, општина Росоман – село Дебреште и во општина Демир Хисар – село Кутретино.

(А.П.)