
Словенечкиот кошаркарски репрезентативец Лука Дончиќ, реши да ја искористи паузата помеѓу крајот на НБА сезоната и почетокот на подготовките за Евробаскетот за да ја намали својата тежина.
Дончиќ често е мета на критичарите на кои не им се допаѓа неговата прекумерна тежина. Тој проблем беше наведен како една од причините зошто Далас го продаде на Лос Анџелес Лејкерси. Според некои извештаи, Лука имал до 122 килограми во текот на сезоната, иако официјалните податоци гласеле – 104 килограми.
Сега тој решил таа бројка да биде двоцифрена. А зад сè стојат 230 милиони причини.
Словенечките медиуми открија дека Дончиќ ја започнал својата посебна работа веднаш по пристигнувањето во Љубљана од Лос Анџелес. Дончиќ се подготвува во длабока тајност, а губењето на тежината е резултат на комбинација од фитнес тренинг во теретана и драстична промена во исхраната.
Тоа би го ставило Лука во оптимална позиција, што би му овозможило да биде побрз и поагилен на теренот, што е она на што се надеваат Лејкерсите. Славниот клуб од Лос Анџелес го постави тоа како услов, па затоа е подготвен да му понуди на Словенецот нов договор вреден 230.000.000 долари.
Ова исто така би значело дека познатиот клуб има намера да ја гради иднината на тимот околу Дончиќ, со идеја да се врати на самиот врв на НБА лигата, каде што тој не бил долго време. Лејкерси последен пат беа шампиони во 2020 година, што е нивна единствена титула по 2010 година.