Донбас, НАТО и западните трупи се клучот за мирот во Украина?!

Агенцијата Ројтерс ексклузивно објави дека Кремљ е подготвен за компромис, но дека војната ќе продолжи ако Киев ја отфрли понудата.

Рускиот претседател Владимир Путин изјави дека Украина мора да го отстапи целиот Донбас, да се откаже од членството во НАТО и да спречи присуство на западни трупи во земјата, открија за Ројтерс три извори блиски до Кремљ.

Путин ги презентирал овие барања на самитот во Енкориџ, каде што се сретна со американскиот претседател Доналд Трамп за прв пат по повеќе од четири години. Разговорите траеја три часа, а речиси целиот состанок беше посветен на прашањето за мирот во Украина.

Зборувајќи по состанокот, Путин рече дека се надева дека ќе „го отвори патот кон мирот“, додека Трамп не даде детали.

За разлика од претходните барања од 2024 година, кога Москва бараше предавање на сите четири украински региони што ги смета за дел од Русија, Путин сега е подготвен за компромис:

Украина би се повлекла од Донбас во целост.

Линиите на фронтот во Запорожје и Херсон би биле замрзнати.

Русија би се откажала од мали делови од регионите Харков, Суми и Дњепропетровск кои моментално ги контролира.

Сепак, рускиот лидер сè уште бара гаранции дека НАТО нема да го прошири своето присуство кон исток, дека украинската армија ќе биде ограничена и дека западните мировници нема да стапнат на украинска територија.

Претседателот Володимир Зеленски повторно ја отфрли идејата за повлекување од меѓународно признатите територии.

„Ако зборуваме за едноставно повлекување од исток – не можеме да го сториме тоа. Ова е прашање на опстанок на нашата земја“, рече Зеленски.

Уставот на Украина го предвидува членството во НАТО како стратешка цел, а Киев инсистира дека Москва нема право да одлучува за тоа.

Извори тврдат дека самитот во Енкориџ донесе најдобра шанса за мир од почетокот на војната, но дека остануваат големи пречки – особено, подготвеноста на Украина да ги отстапи преостанатите делови од Донбас.

САД не коментираа дали ќе ги признаат териториите контролирани од Русија. Лидерите на Велика Британија, Франција и Германија изразија скептицизам дека Путин навистина сака крај на војната.