Доналд Трамп ги укина пените, Американците сега немаат кусур за враќање

Американските бизниси се соочуваат со бизарен недостиг на пени, монета од еден цент. Откако администрацијата на Доналд Трамп го запре нивното ковање претходно оваа година, монетите во оптек стануваат сè поретки, при што многу продавници се принудени да ги заокружуваат сметките за готовина на најблиските пет центи бидејќи нема јасни федерални упатства за тоа како да се направи тоа, пишува Би-Би-Си.

Во февруари, претседателот Доналд Трамп го нарече производството на монетата расипничко и премногу скапо, и се огласи на социјалните медиуми за да повика да се „исфрли отпадот од буџетот на нашата голема нација, дури и ако е пени по пени“.

Ковачницата на пари на САД официјално престана да произведува пени во мај. Иако Министерството за финансии предвиде дека недостигот нема да се случи до почетокот на 2026 година, проблемот се појави многу порано. Банките не можат да добијат пени од федералната влада, што значи дека бизнисите не можат да ги добијат ниту од банките.

Сега продавачите се наоѓаат во ситуација каде што не знаат што да прават кога на нивните каси ќе им снема парички, а на купувачот му треба остатокот од парите од купувањето во готово. Привремено решение за многумина, вели Дилан Џон, виш директор за односи со владата во Националната федерација на малопродажба, е да ја заокружат цената нагоре или надолу на најблиските пет центи, така што остатокот може да се врати во монета од пет центи, позната како „никал“.

Сепак, не е толку едноставно. Некои градови, вклучувајќи го и Њујорк, законски бараат од трговците да го вратат точниот износ, додека други не дозволуваат цената за плаќања во готово да се разликува од цената за плаќања со картички, објасни Џон. За да избегнат тужби и жалби од клиенти, многу трговци на мало одлучија едноставно да ги заокружат цените надолу.

„Зборуваме за губење до четири центи за секоја трансакција во готово во повеќе продавници низ целата земја“, рече Џон. „Тоа е неодржливо“.

Многу продавници сега ги охрабруваат клиентите да плаќаат со точниот износ, а некои дури и организираат промоции што ги наградуваат клиентите кои ќе донеса дополнителни пени од дома.