Домен Превц ја израдува цела Словенија: Да направев грешка…

Словенечката комбинирана репрезентација во скијачки скокови го освои златниот медал на Зимските олимписки игри 2026, чии домаќини се Милано и Кортина. Откако не успеаја во поединечна конкуренција, Домен и Ника Превц ја предводеа репрезентацијата до златото, што ја воодушеви целата нација.

На овој начин, Словенија го одбрани златниот медал што го освои пред четири години, иако речиси целосно го промени тимот. Во споредба со Пекинг, само Ника Водан беше дел од тимот и овој пат беше придружувана од Ника Превц, Анже Ланишек и од Домен Превц. Норвешка го освои второто место, а бронзата замина во рацете на Јапонија.

Натпреварувањето го реши скокот на Домен Превц во последната серија. Најдобриот натпреварувач од оваа сезона не остави простор за калкулации, но направи фантастичен скок и ја потврди доминацијата, која траеше во текот на целиот ден.

• Си реков дека морам да ја завршам работата што е можно подобро. Се тресев доста, но на крајот успеав. Да направев грешка пред неа, ќе пропаднев во земја, сето ова е поради сестра ми – изјави Превц за словенечката национална телевизија.

Словенците беа многу добро подготвени од самиот почеток и направија сигурни чекори кон златниот медал, што има особено значење за Домен. Тој сега е четвртиот член на семејството Превц што освоил медал на Зимските олимписки игри. Петер Превц освои бронза и сребро во поединечна дисциплина, сребро во екипна дисциплина и злато во мешана комбинација, Цене Превц беше дел од тимот што освои сребро пред четири години, а пред неколку дена Ника освои и сребрен медал во поединечна дисциплина.