Домашен притвор за адвокатот кој го обвини Вучиќ за „Сараево сафари“

Адвокатот од Србија, Чедомир Стојковиќ, е ставен во домашен притвор со електронски мониторинг, потврдија судски извори.

Како што самиот наведе, во образложението на одлуката како една од причините за одредување на мерката домашен притвор е наведено неговото користење на социјалните мрежи.

Стојковиќ е познат во јавноста како еден од најгласните критичари на власта и, како што самиот истакнува, „на режимот на српскиот претседател Александар Вучиќ“.

Тој неодамна беше гостин на Федералната телевизија, каде што зборуваше за, како што изјави, доказите поврзани со поврзаноста на Александар Вучиќ со таканареченото „снајпер сафари“ во Сараево за време на војната.

Одлуката за домашен притвор предизвика бројни реакции во јавноста и на социјалните мрежи, каде што многу луѓе го поврзуваат случајот на Стојковиќ со неговите јавни настапи и критики кон властите во Србија.

Притворањето на адвокатот Чедомир Стојковиќ поради користење на YouTube претставува едно од најфлагрантните кршења на основните човекови права од страна на режимот на Александар Вучиќ, наведува Партијата за слобода и правда во соопштението.

„Стојковиќ прво беше приведен под обвинение за повикување на уривање на уставниот поредок затоа што во своите твитови повикува на соборување на Александар Вучиќ. Како во Уставот да пишува дека Вучиќ и неговата организирана криминална група се на власт во Србија“, додадоа тие.

Иако никогаш не повикувал на насилство, од ССП тврдат дека на Стојковиќ му е забрането да го користи Јутјуб, а бидејќи продолжил со својот подкаст на Јутјуб, судот му одредил куќен притвор. Партијата потсетува дека таква мерка му била изречена и на Шариќ по седум години во притвор за низа кривични дела, меѓу кои и трговија со тони и тони кокаин.