Маж од Пунта Горда, Флорида, е обвинет дека влегол во локален супермаркет и нападнал купувач со скалпел – засекувајќи го по лицето – само затоа што жртвата изгледала како некој роден во 1960-тите години, факт што, од некоја причина, му пречел на осомничениот.
Ремзи Томас Лајонс (47) се соочува со обвинение за тежок напад, откако во саботата вечерта, во супермаркетот „Publix“, без никаква провокација, нападнал 70-годишен маж со остар предмет, соопшти полицијата.
Возвиениот маж им изјавил на полицајците дека се наоѓал во еден од ходниците во продавницата кога почувствувал удар, за кој помислил дека е тупаница, во левата страна од лицето, се наведува во полицискиот извештај за апсење, во кој увид имале локалните медиуми.
Кога се свртел, го видел Лајонс како стои таму, гледајќи го вкочането додека во раката држел скалпел.
Жртвата раскажала дека, кога ги тргнала рацете од лицето, видела крв и сфатила дека била нападната со остар предмет.
„Изгледаше како да е од 1960-тите години.“
Полициски службеници од Пунта Горда пристигнале во супермаркетот по пријава за напад и го затекнале Лајонс како стои близу влезот, држејќи ги рацете на главата.
Осомничениот бил приведен; тој ѝ кажал на полицијата дека боледува од недијагностицирано ментално заболување и дека не ја сака „ерата на 1960-тите“.
Кога полицајците го прашале зошто носел скалпел, Лајонс одговорил дека дошол во продавницата со намера да убие некого.
Тој изјавил дека еден постар маж „изгледал како да е од 1960-тите“, што го поттикнало да посака да го „елиминира“.
„Едноставно го извадив од џебот и му го забив во вратот“, рекол Лајонс, додавајќи дека по нападот го фрлил скалпелот во преминот меѓу полиците, за полицајците да не се вознемират кога ќе пристигнат.
Осомничениот исто така признал дека во текот на претходните два дена размислувал да нападне некого.
„Кој би помислил дека, додека сосема нормално пазарите намирници и си гледате своја работа, може да ви пријде некој целосен непознат човек и едноставно да ве нападне? Тоа е навистина застрашувачки“, изјавила за „Галф коуст њуз“ (Gulf Coast News) Ким Блек, која работи во блискиот деловен објект.
Жртвата е хоспитализирана; напаѓачот ѝ бил познат на полицијата од претходно
Седумдесетгодишен маж бил згрижен во локална болница поради длабока расекотина која се протегала од левиот образ – близу устата – преку долната вилица, па сè до вратот.
Лекарите морале да стават повеќе шевови. Лајонс бил сместен во затворот во округот Шарлот, каде што, според последните информации од понеделникот попладне, и останал.
Според достапните евиденции што ги разгледа „Индипендент“ (The Independent), Лајонс и претходно бил притворан во истиот затвор, под обвиненија за физичко насилство во 2023 и 2025 година.
„Дефинитивно постои некаков проблем со неговото ментално здравје што треба да се испита“, изјавил еден локален жител за „Винк њуз“ (WINK News).
Друг жител изразил шок поради инцидентот.
„Не знам што прават луѓето веќе. Понекогаш навистина останувам шокиран“, рекол тој.
