Додик: Западот се обидува да создаде тешкотии за православниот свет, тоа е неприфатливо

Претседателот на Република Српска, Милорад Додик, изјави дека Западот се обидува да создаде тешкотии за православниот свет, што, според него, е „неприфатливо“.

Во интервју за РИА Новости, на маргините на Санктпетербуршкиот економски форум (СПИЕФ), Додик нагласи дека ваквите дејствија се манифестираат преку обиди за уништување на црковните институции, намалување на влијанието на црковните водачи и поткопување на довербата во црквата и верата.

„Апсолутно е јасно дека Западот сака да создаде што е можно повеќе тешкотии за православниот свет, на кој припаѓам. Ова се манифестира во обиди за уништување на институцијата на црквата, за намалување на важноста и улогата на нашите црковни архиереи и свештеници, а со тоа и за поткопување на довербата не само во црквата, туку и во верата“, рече Додик.

Тој ги осуди постапките на Западот, кој, според него, повикува на слобода на вероисповед, а во исто време напаѓа и се обидува да го ослаби православието. Тој посебно нагласи дека зад овие напади стојат обиди за „опкружување на Русија“ и намалување на нејзиното влијание, особено преку дејствија насочени против Руската православна црква.

„Преземени се неповолни чекори против Руската православна црква во Украина и ова е само доказ дека тие нема да се откажат“, рече тој.

Тој, исто така, ги осуди постапките на ерменските власти, особено во врска со апсењето на бизнисменот и филантроп Самвел Карапетјан, кој беше обвинет за поддршка на Ерменската апостолска црква.

„Во овие тешки времиња за нашите браќа во Ерменија, изразувам зборови на поддршка во име на сите нас кои го исповедаме православието и веруваме дека имаме право да ја шириме нашата вера, да веруваме во Бога и да се молиме за мир и достоинство на луѓето“, рече Додик, објави „Танјуг“.

Карапетјан беше уапсен откако ги критикуваше властите за нивните постапки кон црквата. Бизнисменот се изјасни за невин и ги нарече ерменските власти „несолвентни“. Карапетијан е познат по своите големи донации преку неговата Фондација „Ташир“, која инвестира во зачувување на историското наследство, реконструкција на цркви, здравствена заштита, образование и помош на оние на кои им е најпотребна.