Додека сите славеа, некој добро се „офајдил“: Искористил грешка на популарна берза за криптовалути и заработил 1,5 милиони долари

Крипто трговец познат како Вида заработи повеќе од 1,5 милиони долари за само неколку часа на Нова Година. Вида ја искористи необична грешка на берзата Binance, каде што непознат корисник постави огромна нарачка за купување на токенот BROCCOLI714, кој ретко е познат и потценет.

Драмата започна околу четири часот наутро, кога Вида забележал нарачка за купување токени во вредност од 26 милиони долари. Бидејќи вкупната пазарна вредност на сите такви токени беше само околу 40 милиони долари, беше јасно дека станува збор за аномалија. Вида процени дека станува збор за хакирана сметка или за сериозна грешка во програмирањето.

Поради огромната побарувачка, цената на токенот скокна нагло. Вида веднаш ја прилагоди стратегијата и отвори долга позиција, очекувајќи понатамошен раст на цената за подоцна да продаде по повисока вредност.

За време на скокот на цената, беа активирани безбедносните механизми на Binance, што создаде можност за арбитража – искористувајќи ја разликата во цената на истиот токен на различни пазари. Спот цената (купување веднаш за готовина) беше значително повисока од фјучерс цената (договори за идна вредност). Вида брзо купи таму каде што беше поевтино и продаде таму каде што беше поскапо, балансирајќи го ризикот со одделот за контрола на берзата.

Околу 4:20 часот наутро, Вида ги продаде сите свои позиции и оствари профит од 1,5 милиони долари. Десет минути подоцна, нарачката од 26 милиони долари исчезна, а цената на токенот нагло падна. Потоа трговецот отвори кратка позиција, продавајќи ги позајмените токени, а подоцна ги купи назад по пониска цена, дополнително зголемувајќи го својот профит.

Binance изјави дека нивната внатрешна истрага не пронашла докази за хакирање, оставајќи отворена можност некој погрешно или намерно да ја манипулирал цената на токенот. Цената на BROCCOLI714 брзо се врати на нивото пред инцидентот.