Додека Европејците се подготвуваат да преминат на зимско сметање на времето овој викенд, Европската комисија во четвртокот ја бранеше својата позиција за прекинување на промената на часовникот двапати годишно, мерка која беше поддржана и од граѓаните за време на јавна консултација.
Преминувањето на зимско или летно сметање на времето на шест месеци се спроведува во Европа од 1970-тите години за заштеда на енергија за време на нафтената криза.
Европската комисија предложи негово укинување во 2018 година по обемни консултации низ цела Европа.
Точно 84% од учесниците, или околу четири милиони луѓе, гласаа за прекин на практиката, а Парламентот потоа даде зелено светло.
Поддржувачите на укинувањето посочуваат на негативните влијанија од промената на времето врз здравјето, додека заштедите на енергија беа скромни, особено поради широкото усвојување на енергетски ефикасно осветлување.
Сепак, мерката никогаш не беше спроведена поради недостаток на согласност меѓу 27-те земји-членки.
По повод преминувањето на зимско сметање на времето, европратениците повторно го покренаа прашањето за време на дебатата во Стразбур.
„Дојде време конечно да се запре промената на времето“, рече комесарот за транспорт Апостолос Цицикостас, потврдувајќи дека европската извршна власт не се откажала од борбата.
Системот „нè засега сите, ги нервира повеќето од нас, па дури и би рекол дека ни штети“, додека „веќе не генерира заштеди на енергија“, рече комесарот.
Комисијата нарача нова анализа за да ги поддржи своите напори за ставање крај на промената на времето.
Шпанија, исто така, започна нов повик за крај на промената на времето на состанокот на министрите за енергетика во понеделник. Според европски дипломатски извор, Полска и Финска изразија поддршка за овој пристап.
„Менувањето на часовниците двапати годишно веќе нема смисла. Тоа едвај придонесува за заштеда на енергија, но има негативни ефекти врз здравјето и животот на луѓето“, напиша шпанскиот премиер Педро Санчез на социјалната мрежа X.
