Додека во саботата камерите го „ловеа“ американскиот претседател Доналд Трамп како придружуван од внуката Каи Трамп спокојно се движи кон голф терен во Вирџинија, социјалните мрежи зовреа од информации дека – починал. Снимката на која тој носи бела поло-маица на која пишува „Трамп“, е направена на тревникот во Белата куќа, на тргнување кон Вирџинија.
Во денешното дигитално време шпекулациите се движат со брзина на светлината. Доволно беше да се забележи една обична модринка на раката на Трамп, тој три дена да не се огласи, а потпретседателот Џеј Ди Вејнс да рече дека е подготвен да ја преземе претседателската функција ако нешто му се случи. И тргнаа гласиштата. Шпекулации дека починал, имаше и порано, а најновата, според Грок, четботот на мрежата „Икс“ предвиден од вештачката интелигенција, во саботата изутрина имаше 1,3 милиони ангажирани корисници. Исто така, во саботата, „#whereistrump“ (#кадеетрамп) беше шестата најпопуларна тема на „Икс“ во САД.
Но, на јадицата на шпекулациите околу наводната смрт на американскиот претседател, Американците се фатија и со помош на таканаречениот „индекс на пица“ на Пентагон. Индексот ги следи онлајн нарачките на пица од пицериите во близина на владини агенции, како што се Пентагон и ЦИА. Во петокот вечерта, кога тргнаа шпекулациите за смртта на Трамп, индексот објави огромен пораст на нарачките, без да ја наведе конкретната причина за тоа.
– „Пица-пица, единственото место во близина на Пентагон отворено по полноќ, денес има скок од 303 проценти во нарачките од Пентагон“, напиша едно лице на „Твитер“ заедно со снимка од екранот со назначено време.
Иако индексот не е официјален, сепак се смета дека порачките на пица доцна навечер имаат заедничко со глобалните кризи повеќе отколку што се очекува. Скокот на нарачките ноќе практично значи дека персоналот на Пентагон или разузнавачите работат до доцна, а тоа ги поттикнува шпекулациите дека се случува нешто големо. Индексот добил потврда на точност во повеќе случаи. Така, во јуни, пред ненадејниот воздушен напад на Израел врз нуклеарните постројки на Иран, речиси секоја пицерија околу Пентагон беше преплавена со нарачки. Девет дена подоцна, пред САД да ја објават својата кампања за бомбардирање на иранските нуклеарни постројки, порачките, исто така, енормно скокнале, а местата за дружење на вработените во Пентагон по работа биле невообичаено тивки. Шемата е тешко да се игнорира по децении „случајности“. Индексот реагирал и во пресрет на американската инвазија на Гренада во 1983 година, кога испораките на пица во близина на Пентагон речиси се удвоиле. Во 1991 година, додека САД се подготвувале за операцијата „Пустинска бура“, нарачките за пица доцна навечер до Пентагон и ЦИА повторно се зголемиле. „Гардијан“ објави дека во август 1990 година, сопственик на франшиза на „Доминос“ во Вашингтон пријавил пораст само неколку часа пред Садам Хусеин да го нападне Кувајт.
Теоријата за „индексот на пица“ на Пентагон се појавила за време на Студената војна кога советските шпиони во Вашингтон наводно ги следеле испораките на пица и ги толкувале ненадејните скокови во нарачките како можни знаци дека американската влада се подготвува за голема акција. Абнормалните порасти во испораките на пица сега може да се гледаат во реално време, благодарение на „Гугл мапс“ и сметките на социјалните медиуми посветени на следење на овие трендови. Додека официјалните лица ја отфрлаат таа теорија, новинарите и истражувачите продолжуваат да набљудуваат. Понекогаш, првиот знак на глобална криза е куп кутии за пица.
