Додека Балканците ги убива рекордната загаденост – ова се оази на чист воздух!

Додека макеоднските граѓани со страв ги проверуваат апликациите за квалитет на воздухот овие денови, гледајќи ги виолетовите и црвените индекси што укажуваат на „нездрав“ или „опасен“ воздух, на другата страна од светот ситуацијата е сосема поинаква.

Кога воздухот во Македонија мириса на смог и печки, а видливоста е намалена на минимум, податоците за земјите со најчист воздух изгледаат речиси нереални. Според најновото рангирање, местата со најнизок индекс на квалитет на воздух (AQI) се претежно островски држави и територии, каде што океанските ветрови играат клучна улога во прочистувањето на атмосферата.

Бахами: Светски шампиони за чист воздух

На апсолутен врв на листата се Бахамите. Со население од околу 407.000 жители, оваа карипска земја има индекс на квалитет на воздух (AQI) од само 13. За споредба, во зимските денови во Македонија овој индекс често надминува 200 или 300.

Бермуди и Француска Полинезија

Веднаш по Бахамите следуваат Бермуди (население 63.867) и Француска Полинезија (население 304.032), обете со индекс од 14. Кристално чистото море тука е придружено со кристално чист воздух.

Американски Девствени Острови

Овој карипски рај, со население од нешто над 105.000 луѓе, исто така се гордее со индекс од 14, што го прави идеален рај за белите дробови.

Порторико и Монтсерат

Со значително поголемо население од над 3,2 милиони луѓе, Порторико успева да одржи фантастичен квалитет на воздухот со индекс од 15. Истиот резултат го бележи и малиот Монтсерат, дом на само 4.389 жители.

Барбадос и Гренада

Карипските дестинации продолжуваат со Барбадос со индекс од 17 и Гренада со индекс од 18. Се чини дека рецептот за здрав воздух е едноставен – живеење на остров опкружен со океан.

Исклучоци во постудените региони: Исланд и Нов Зеланд

Иако на листата доминираат топли, тропски дестинации, меѓу првите десет се наоѓаат и две земји кои нудат различна клима, но подеднакво квалитетен воздух:

Исланд: Оваа вулканска земја во северна Европа, со население од 372.520 жители, е на 9-то место со индекс од 22. Силните ветрови и геотермалната енергија ја прават едно од еколошки најчистите места на планетата.

Нов Зеланд: Листата со првите 10 ја затвора Нов Зеланд (AQI 24), докажувајќи дека дури и земјите со поголемо население (над 5,1 милиони) можат да одржат високо ниво на квалитет на живот и животна средина.