Додека американскиот претседател ужива на ручекот во Виндзор: Протести во центарот на Лондон против посетата на Трамп

Додека американскиот претседател Доналд Трамп руча со британското кралско семејство во Виндзор, демонстрантите се собираат во центарот на Лондон на протест против него, кој треба да започне за неколку часа, објавува „Си-Ен-Ен“.

Демонстрантите носат транспаренти и знамиња со слогани против американскиот лидер, вклучувајќи „запрете го Трамп“ и други, објавува „Си-ен-ен“.

Некои од нив се маскираа во личности како рускиот претседател Владимир Путин, израелскиот премиер Бенјамин Нетанјаху и влијателниот човек Ендру Тејт, држејќи знаци како „воени злосторници за Трамп“, „убијци за Трамп“ и „женомрзци за Трамп“.

Многумина на протестот носеа и транспаренти што се однесуваа на специфични политички прашања во кои Трамп интервенираше, вклучувајќи го конфликтот меѓу Русија и Украина, како и војната на Израел во Газа.

Други знаци го споменуваат и осудениот сексуален престапник Џефри Епстин, објавува „Си-ен-ен“, од кого Трамп долго време се обидуваше да се дистанцира, иако постојат докази за нивното поранешно пријателство.

„Не на фашистичкиот режим на Трамп“, пишува на еден постер, додека друг го нарекува американскиот лидер „најодвратното нешто во Лондон од чумата“.

„Овој син на преживеан од Холокаустот вели: Запрете го геноцидот во Газа!“, пишува на еден знак. Во вторник, независна комисија на Обединетите нации заклучи дека Израел врши геноцид во Газа. Израел жестоко го негираше тврдењето.