Со последните денови од декември, во Преспа се заокружи една година исполнета со разговори, средби и со споделена грижа за животната средина. Последните дискусии организирани во селата Кривини, Јанковец, Болно и Царев Двор, како и во Ресен, ја имаа истата цел: да ги слушнат луѓето и да се побараат решенија.
– Преку отворени и продуктивни разговори, околу 70 жители директно се вклучија со конкретни предлози и идеи за подобрување на животната средина во нивните населени места. По актуелните поплави и штетите што ги оставија зад себе, мештаните најмногу зборуваа за запуштените речни корита, затрупани со градежен и со кабаст отпад и обраснати со непотребна вегетација, кои во критични моменти стануваат сериозна закана. Паралелно, се отвори и прашањето за селектирањето на отпадот и за недостигот од функционални решенија на локално ниво – велат од „Преспа, разбуди се“.
Главни проблеми што ги загрозуваат квалитетот на живот и природата во регионот се: дивите депонии, јавната нечистотија во селата, несоодветното управување со речните корита, отпадот од пестициди и слабата комуникација меѓу заедницата и институциите.
– Жителите испратија и јасна порака дека е потребна поголема едукација, посилно вклучување на заедниците во локалните акции и транспарентно информирање при креирањето на плановите за управување со отпадот. Решенија, велат, се можни, но само ако сите ја споделиме одговорноста – велат од „Преспа, разбуди се“.
Дискусиите се одржуваат во рамките на кампањата „Преспа? Разбуди се за чиста средина“, која ја спроведува Институтот за комуникациски студии (ИКС), во соработка со „Екогерила“ – Преспа и Македонското еколошко друштво, со поддршка од Европската Унија, преку програмата „ЕУ за Преспа“.
