Дипломатија зад кулисите: Човекот на Трамп тајно се сретнал со луѓето на Путин/ВИДЕО

Американскиот функционер Родни Мимс Кук помладиот ја посетил Русија ова лето на дискретна дипломатска мисија, каде што разговарал со претставниците на Кремљ за можностите за надминување на застојот во односите меѓу Вашингтон и Москва.

Според „Фајненшл тајмс“, Кук, кој раководи со Комисијата за ликовни уметности и ја надгледува изградбата на балската сала во Белата куќа, добил дипломатски пасош и детални брифинзи пред неговото патување во Санкт Петербург. Тој, исто така, имал безбедносна придружба со дипломатски статус за време на престојот.

Според извори во овој весник, американската администрација верувала дека ваквите неофицијални канали би можеле да помогнат во започнувањето дијалог за војната во Украина. Кук присуствуваше на Меѓународниот економски форум во Санкт Петербург во јуни, станувајќи првиот американски функционер од 2018 година што учествуваше на настанот, честопати наречен „Путиновиот Давос“.

За време на неговата посета, тој се сретна, меѓу другите, со Антон Кобјаков, еден од главните помошници на рускиот претседател Владимир Путин.

Кук не сакаше да открие детали од неговите разговори со руските функционери, ниту да потврди дали Доналд Трамп лично го замолил да ги продолжи контактите со Москва.

🇺🇸🇷🇺 Chair of the U.S. Commission of Fine Arts Rodney Mims Cook Jr. to President Putin:
I do give a good hello from your friend President Trump, and I am encouraged by everything that has happened since I've been here, Mr. President.

We have a lot of ideas to talk about between… pic.twitter.com/ZWtc8tZZBM

— Visioner (@visionergeo) June 5, 2026

„Ја познавам руската култура и го познавам поголемиот дел од раководството на нивните културни институции“, изјави Кук за Фајненшл тајмс.

Американскиот функционер не беше сам во Русија. Тој беше придружуван од Владимир Толстој, поранешен долгогодишен советник за култура на Путин и правнук на познатиот руски писател Лав Толстој.

„Пријатели сме со децении. Тој е суперѕвезда“, рече Кук за Толстој.

За време на економскиот форум, Кук имаше можност да му се обрати и на Владимир Путин. Тој пренесе поздрави од американскиот претседател Доналд Трамп и навести дека наскоро би можеле да следат разговори меѓу Вашингтон и Москва.

„Имаме многу идеи што нашите два главни градови треба да ги разгледаат следната недела“, му рече Кук на Путин.

Рускиот претседател му се заблагодари за тоа.

Посетата на американскиот функционер претставува еден од необичните канали за комуникација меѓу Вашингтон и Москва во време кога дипломатските односи меѓу двете земји се оптоварени од војната во Украина, а официјалните преговори за нејзино завршување се соочуваат со сериозни пречки.