САД го засилија притисокот врз Иран оваа недела, поставувајќи рок од еден месец за постигнување договор и најавувајќи испраќање на втор носач на авиони во Персискиот Залив.
Иран и САД одржаа индиректни разговори во Оман на 6 февруари, со посредство на земјата, а нова рунда е најавена за следната недела во Женева. Ова се првите разговори по минатогодишниот американско-израелски напад врз Иран во јуни, како и бруталното задушување на масовните протести предизвикани од тешката економска криза. Илјадници луѓе се убиени, а десетици илјади се уапсени, пренесува ХИНА.
Трамп рече дека верува оти Иран сака договор и изрази надеж дека разговорите ќе бидат завршени во рок од еден месец, заканувајќи се со „многу сериозни“ последици доколку не се постигне договор. Тој потсети на бомбардирањето на иранските нуклеарни постројки за време на 12-дневната војна минатата година и нагласи дека „сите опции се на маса“, вклучително и можноста за промена на режимот.
Израелскиот премиер Бенјамин Нетанјаху по средбата со Трамп изјави дека ги поддржува напорите за постигнување договор, но изрази скептицизам, нагласувајќи дека договорот мора да ги опфати не само нуклеарната програма, туку и балистичките ракети и поддршката за иранските сојузници како што се Хезболах, Хамас и Хутите.
Техеран, од друга страна, сака да зборува исклучиво за нуклеарната програма и бара укинување на санкциите, додека ракетната програма ја смета за црвена линија. Сепак, покажа подготвеност да разговара за нивото и чистотата на збогатениот ураниум.
Турскиот министер за надворешни работи Хакан Фидан оцени дека има простор за компромис, наведувајќи дека Американците покажуваат подготвеност да прифатат ограничено иранско збогатување на ураниум, додека Техеран ја признава и потребата од договор.
Трамп потврди дека носачот на авиони „УСС Џералд Р. Форд“ наскоро ќе биде испратен на Блискиот Исток, каде што ќе му се придружи на носачот „УСС Абрахам Линколн“. Американската војска, според официјални лица, се подготвува и за можноста за подолга воена операција доколку Белата куќа издаде наредба за напад.
Иран се закани дека ќе ги таргетира американските бази во регионот доколку бидат нападнати, зголемувајќи го ризикот од поширок регионален конфликт. Аналитичарите предупредуваат дека разговорите повеќе личат на ултиматум отколку на вистински дипломатски процес, при што некои регионални сили се обидуваат да го насочат Трамп кон дипломатско решение, наместо кон воена ескалација.
