Дијан Хрка, мајката на Стефан, кој загина при уривањето на настрешница на железничката станица во Нови Сад, го поддржа предлогот на возачот на камион Миломир Јаќимовиќ за блокада на Белград и ги повика жителите на Нови Сад да реагираат. Хрка нагласи дека е време за единство и заедничко дејствување, пренесува „Нова.рс“.
На прес-конференција, Хрка изрази задоволство што Јаќимовиќ и неговиот син го прекинаа штрајкот со глад и најави дека ќе се чуе со него вечерва за да разговараат за понатамошните аранжмани.
„Ја поддржувам неговиот план за блокада, но сепак ќе преговараме. Конечно треба да се обединиме, да се собереме под еден покрив и да испланираме како и што ќе правиме следно“, рече Хрка, додавајќи дека Јаќимовиќ треба да пристигне во Белград за четири дена.
„Ајде сите да се согласиме како и што да правиме. Тој најави блокади и јас сум за тоа, блокада до 48 часа, а потоа полека“, рече таа.
Таа потврди дека се чувствува добро и дека престојува во протестниот шатор во близина на српскиот Парламент, кој го нарекува свој „втор дом“.
Хрка пред седумнаесет дена започна штрајк со глад пред Народното собрание на Република Србија во Белград, барајќи решавање на прашањето за одговорноста за смртта на нејзиниот син и другите жртви, што оттогаш го прекина. Во интервјуата, таа наведува дека е подготвена да направи сè за луѓето во Србија да се обединат и да се ослободат од „злото“.
