Дијалогот денеска е повторно на маса! Рама пак ги постави столчињата што ги скршија студентите

Албанскиот премиер Еди Рама ги замени столчињата што студентите ги скршија претходниот ден, повикувајќи ги на дијалог и нагласувајќи дека незадоволството не го оправдува насилството.

„Постојат илјада и една причина за незадоволство, илјада и еден проблем и илјада и една причина за протест – но ниту една причина не го оправдува насилството. Секоја причина е едноставно уште еден аргумент во корист на дијалогот меѓу луѓе кои ја делат истата татковина и ја сакаат истата работа: Албанија да биде подобра“, изјави Рама, пренесува „Еуроњуз Албанија“.

Тој истакна дека, иако правото на протест е неоспорно, насилството претставува кривично дело.

„Вчера, повикот за дијалог беше дочекан со насилство. Денес, дијалогот е повторно на маса“, изјави албанскиот премиер.

Рама ја нагласи својата подготвеност да разговара со секој што има поинакво мислење – различно и од неговото, и од она на мнозинството, кое, како што напомена, во моментов се соочува со притисокот на насилството.

Тој ги повика студентите да се оградат од насилството, предупредувајќи дека секој сторител ќе се соочи со правни и финансиски последици.

„Секој што ќе оштети јавен имот или имот на други лица, ќе мора да плати за тоа“, рече Рама.

Тој додаде дека напредокот и решавањето на проблемите можат да се постигнат преку напорна работа и преку насочување на приходите кон областите на кои им се најпотребни.

„Во Албанија има место за секого; сепак, слободата на еден поединец не може да се протега до точката каде што започнува слободата на друг. Правата на еден поединец не можат да се наметнуваат на начин што го загрозува правото на другите да живеат заедно под истото небо, во демократски и мирен соживот“, заклучи Рама.